QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda eldegi Áleýmettik-ekonomıkalyq jaǵdaıdy turaqtandyrý jónindegi jedel is-qımyl jospary qaraldy
Ulttyq ekonomıka mınıstri Álibek Qýantyrov pen İshki ister mınıstri Erlan Turǵymbaev baıandama jasady, dep habarlaıdy Almaty-akshamy.kz
Eldegi Áleýmettik-ekonomıkalyq jaǵdaıdy turaqtandyrý jónindegi jedel is-qımyl jospary Memleket basshysy Qasym-Jomart Kemeluly Toqaevtyń tapsyrmasy boıynsha ázirlendi. Qujat azamattar men bıznes sýbektileriniń qaýipsizdigi men olardy jan-jaqty qoldaýǵa, sondaı-aq eldegi áleýmettik-ekonomıkalyq jaǵdaıdy tez arada turaqtandyrýǵa baǵyttalǵan birqatar shuǵyl jáne qysqa merzimdi sharalardy qamtıdy.
«Jospardy iske asyrý barysynda, birinshi kezekte, qaza tapqan azamattardyń otbasylary men zardap shekkenderge kómek kórsetiledi. Kúshtik qurylymdar men azamattyq qorǵaý organdarynyń qyzmetkerlerine de tıisti memlekettik qoldaý kórsetiledi. Jospardyń İİM-ge qatysty barlyq tarmaqtary óte mańyzdy jáne olar sapaly ári jedel oryndalýy tıis», - dedi Á. Smaıylov.
Úkimet basshysy jappaı tártipsizdikter saldarynan zardap shekken azamattar men zańdy tulǵalardyń banktegi qaryzdary men mıkrokredıtterin óteý merzimi tótenshe jaǵdaı rejımi aıaqtalǵanǵa deıin keıinge shegerilgenin atap ótti. «Atameken» UKP maroderlikten zardap shekken bıznes sýbektileriniń tizilimin jasady.
Jappaı tártipsizdikterdiń saldaryn joıý jónindegi úkimettik jáne óńirlik komısıalar jumysynyń qorytyndylary boıynsha keltirilgen zalaldyń ornyn toltyrý úshin respýblıkalyq jáne jergilikti búdjetterden tıisti qarajat bólinedi.
Bızneske túsken aýyrtpalyqty azaıtý úshin 2022 jylǵy 1 aqpanǵa deıin memlekettik kirister organdarynyń salyqtyq jáne kedendik tekserýleri, sondaı-aq kameraldyq baqylaý boıynsha habarlamalardy berý ýaqytsha toqtatylady. «Atameken» UKP-men birlesip, halyqtyń tabysyn arttyrý baǵdarlamasyn ázirlep, qabyldaý josparlanǵan.
«Biz úshin eń basty maqsat – ol halyqtyń tabysyn arttyrý. Kez kelgen jospar, kez kelgen baǵdarlama, birinshi kezekte, halyqtyń tabysyn arttyrýǵa baǵyttalýy tıis. Basqarýdyń barlyq deńgeıinde jumys tıimdiligi dál osy kórsetkish boıynsha baǵalanatyn bolady», - dedi Á. Smaıylov.
Jastar arasyndaǵy jumyssyzdyq deńgeıin tómendetý maqsatynda «Jastar praktıkasy» jáne «Alǵashqy jumys orny» jobalary sheńberinde jalaqy mólsheri men jobalarǵa qatysý merzimi ulǵaıady.
Jańadan qurylǵan «Qazaqstan halqyna» qoǵamdyq áleýmettik qory muqtaj balalarǵa zamanaýı jáne qymbat turatyn medısınalyq qyzmetterdi, dári-dármekterdi alýǵa múmkindik beredi.
Premer-Mınıstr memlekettik organdardyń birinshi basshylary men óńirlerdiń ákimderine eldegi Áleýmettik-ekonomıkalyq jaǵdaıdy turaqtandyrý jónindegi jedel is-qımyl josparynyń is-sharalaryn júzege asyrýdy jeke baqylaýǵa alýdy tapsyrdy