Jappaı tártipsizdikter saldaryn joıý baǵytynda respýblıkalyq jáne jergilikti búdjetterden shyǵyndy óteý úshin tıisti qarajat bólinedi
Bul týraly Úkimet otyrysynda Premer-Mınıstr Álıhan Smaıylov málim etti, dep habarlaıdy Almaty-akshamy.kz QazAqparatqa silteme jasap
«Atameken» palatasy maroderlikten zardap shekken bıznes sýbektileriniń tizilimin jasady. Jappaı tártipsizdikter saldaryn joıý jónindegi úkimettik jáne óńirlik komısıalar jumysyn aıaqtaǵannan keıin respýblıkalyq jáne jergilikti búdjetterden shyǵyndy óteý úshin tıisti qarajat bólinedi. Sonymen qatar bızneske túsken aýyrtpalyqty azaıtý úshin 2022 jylǵy 1 aqpanǵa deıin memlekettik kiris organdarynyń salyqtyq jáne kedendik tekserýleri men kameraldyq baqylaý habarlamalaryn berý ýaqytsha toqtatylady», - dedi Á. Smaıylov.
Onyń aıtýynsha, «Atameken» palatasymen birge Halyqtyń tabysyn arttyrý baǵdarlamasyn ázirlep, qabyldaý josparlanyp otyr.
«Biz úshin eń basty maqsat – halyqtyń tabysyn arttyrý. Kez kelgen jospar, kez kelgen baǵdarlama birinshi kezekte halyqtyń tabysyn arttyrýǵa baǵyttalýy tıis. Basqarýdyń barlyq deńgeıinde jumystyń tıimdiligi dál osy kórsetkish boıynsha baǵalanatyn bolady», - dedi Úkimet basshysy.
Onyń sózine qaraǵanda, jastar arasyndaǵy jumyssyzdyq deńgeıin tómendetý úshin «Jastar praktıkasy» jáne «Alǵashqy jumys orny» jobalary aıasynda jalaqy mólsheri men jobalarǵa qatysý merzimi ulǵaıady. «Qazaqstan halqyna» qoǵamdyq áleýmettik qory muqtaj balalarǵa zamanaýı jáne qymbat turatyn medısınalyq qyzmetter men dári-dármekterdi alýyna múmkindik beredi.
«Jalpy, bul jospardyń iske asyrylýy qańtar oqıǵalarynan keıin eldegi áleýmettik-ekonomıkalyq jaǵdaıdy jedel qalypqa keltirýdi qamtamasyz etedi. Memlekettik organdardyń birinshi basshylary men ákimderge atalǵan jospardaǵy is-sharalardyń oryndalýyn jeke baqylaýǵa alýdy tapsyramyn», - dedi Premer-Mınıstr.