Úıindiler astynan segiz myńnan astam adam qutqarylǵan
Túrkıa Prezıdenti Rejep Taıyp Erdoǵan joıqyn zilzaladan zardap shekken 10 provınsıada 3 aıǵa tótenshe jaǵdaı rejımin engizgenin jarıalady, dep habarlaıdy Almaty-akshamy.kz QazAqparat agenttigine silteme jasap.
Túrkıa basshysy, sońǵy málimet boıynsha, 3 549 adamnyń jer silkinisiniń qurbany bolǵanyn, 22 168 adamnyń jaraqat alǵanyn aıtty. Úıindiler astynan segiz myńnan astam adam qutqarylǵan.
«Biz Túrkıa tarıhyndaǵy ǵana emes, tutas aımaq pen álemdegi eń úlken apattardyń birine tap boldyq. Apat aımaǵynda jumys isteý úshin barlyq memlekettik qurylymdar, qyzmetkerler men tehnıkalar jumyldyryldy. Birinshi kezeńde apat aımaǵynyń turǵyndaryna shuǵyl kómek kórsetýge 100 mlrd lıra bólindi», - dedi R. Erdoǵan.
Zilzala aımaǵyna 54 myń shatyr, 102 myń kereýet, bastapqy qajetti zattar, 1000-ǵa jýyq jedel járdem vagondary, eki sanıtarlyq ushaq jiberildi. On provınsıanyń turǵyndaryna 5 myń medısınalyq qyzmetker kómektesip jatyr.
Erdoǵannyń aıtýynsha, apat aımaǵynda 53 317 qutqarýshy jumyldyryldy. Olardyń sany Túrkıa men basqa elderdiń komandalarynyń arqasynda kún sanap artyp keledi. Sondaı-aq, Túrkıa Prezıdenti alapat jer silkinisiniń saldaryn joıýda yntymaqtastyqqa shaqyrdy.
«Biz jalǵan aqparat pen feık arqyly qoǵamǵa alaýyzdyq taratý áreketterin kórip otyrmyz. Barlyǵy úshin ýaqyty kelgende jaýap alamyz», - dedi R. Erdoǵan.
Sonymen birge, Prezıdent Túrkıa úkimeti janyndaǵy tótenshe jaǵdaı saldaryn boldyrmaý jáne joıý basqarmasynyń (AFAD) banktik shottaryna túrik lıralary men shetel valútasyndaǵy qarajat aýdarylǵany úshin komısıa alynyp tastalǵanyn aıtty.