Inkasatorlar tonaýshylardy óz betinshe ustaýǵa tyrysqan
7 aqpanda Almaty qalalyq qylmystyq ister jónindegi mamandandyrylǵan aýdanaralyq soty qańtar oqıǵasy kezinde aqsha aıyrbastaý pýnktteriniń biriniń janynda kisi óltirdi degen kúdikke ilingen İlıas Baıdýalıevke qatysty úkim shyǵardy. Ol 8 jylǵa bas bostandyǵynan aıyryldy, dep habarlaıdy Almaty-akshamy.kz Egemen.kz-ke silteme jasap.
Buǵan deıin İlıas Baıdýalıevke qasaqana kisi óltirdi degen aıyp taǵylǵan edi.
Aıyptalýshynyń qorǵaýshysy Alma Mýsınanyń aıtýynsha, ınkasatorlar tonaýshylardy óz betinshe ustaýǵa tyrysqan. Olar polısıaǵa habarlasý múmkin bolmaǵan soń, ustalǵandardyń qujattary men telefondaryn alyp, quqyq qorǵaý organdaryna múmkindiginshe tezirek berý úshin kóligin bazaǵa shyǵarý týraly sheshim qabyldaǵan. Bir sátte urylardyń biri ári jábirlenýshi Nyǵmetjanov qashyp ketýge tyrysyp, súrinip qulaǵan. Baıdýalıev ony qulaǵan ornynan turǵyzbaq bolǵan kezde abaısyzda oq atylǵan. Keıin Qalejan Nyǵmetjanov 6 qańtarda aýrýhanada qaıtys bolǵany anyqtaldy.
Sottalýshyǵa QR Qylmystyq kodeksiniń 106-baby 3-tarmaǵy «Densaýlyqqa qasaqana aýyr zıan keltirý» boıynsha aıyp taǵyldy.
«Qylmysty zertteý kezinde sotqa deıingi tergeý barysynda da, sotta da barlyq dálelder eskerildi. Sot QR Qylmystyq kodeksiniń 99-baby 15-tarmaǵynyń 2-bóligi (kisi óltirý) boıynsha prokýrordyń ustanymymen kelispedi. Aıyptaý qorytyndysynda Baıdýalıev ony atyp óltirýge ádeıi sheshim qabyldaǵany jáne jábirlenýshi qylmys ornynda qaıtys bolǵandyǵy naqty kórsetilgen. Bul kýágerlerdiń aıǵaqtarymen jáne dárigerlerdiń qorytyndysymen dáleldendi. Sot kisi óltirý abaısyzda bolǵanyn joqqa shyǵardy», - dedi Almaty qalasy qylmystyq ister jónindegi mamandandyrylǵan aýdanaralyq sotynyń sýdıasy Erlan Bolatov.
Sot kináni ishinara moıyndaý túrindegi kináni jeńildetetin mán-jaılardyń bolýyn, Baıdýalıevtiń asyraýynda jas balalardyń bolýyn jáne Nyǵmetjanovtyń zańǵa qaıshy minez-qulqyn eskerdi. Inkasator 8 jylǵa bas bostandyǵynan aıyryldy.