Túrkıadaǵy prezıdent saılaýyna 3 kún qaldy
«Memleket» partıasynyń tóraǵasy, negizgi kandıdattardyń biri Mýharrem Inje úmitkerlikten bas tartty, dep habarlaıdy Almaty-akshamy.kz Habar 24 telearnasyna silteme jasap.
Ol munysyn ózine qarsy jasalǵan arandatýshylyqtarmen baılanystyrady. Mýharrem Inje sonymen qatar Rejep Taıyp Erdoǵandy emes, onyń basty básekelesi – Respýblıkalyq halyq partıasynyń basshysy Kemal Kylychdaroǵlýdy qoldaıtynyn aıtyp qaldy. Túrkıada saıası doda kún saıyn qyza túsýde. Saǵat sanap prezıdenttikke úmitkerler men parlamentte depýtat sanyn kóbeıtkisi keletin partıalar bir- birinen asyp-túsetin ýádelerdi úıip tógýde. Memleket partıasynyń tóraǵasy Mýharrem Inje búgin kútpegen málimdeme jasap, úmitker bolýdan bas tartty. Ol óz sheshimin oǵan jasalǵan arandatýshylyqpen baılanystyrdy.
«Men saıasatta júrgenime 40 jyldan asty, biraq osy jyldar ishinde sońǵy 45 kúnde bolǵan dúnıeler meni shoshytty. Jalǵan chekter, jalǵan beıneler. Meniń sýretim ızraıldik eresekter saıttarynda jarıalandy. Polısıa da, prokýratýra da tekserip jatqan joq. Bul jaladan Túrik memleketi meniń abyroıymdy qorǵaı almaı otyr», - deıdi «Memleket» partıasynyń tóraǵasy Mýharrem Inje.
Osylaısha, prezıdenttikke 3 úmitker – qazirgi memleket basshysy, Ádilet jáne damý partıasynyń jetekshisi Rejep Taıyp Erdoǵan, onyń basty qarsylasy Kylychdaroǵlý jáne ATA alánsynan úmitker Sınan Ogan qaldy. Al aldyn ala jasalǵan saýalnamalarǵa sáıkes, 2 negizgi kandıdat bar. Olar – qazirgi memleket basshysy Rejep Taıyp Erdoǵan men opozısıalyq «Halyq alánsy» partıalarynyń biryńǵaı kandıdaty Kemal Kylychdaroǵlý. Eldiń qazirgi Prezıdenti Rejep Taıyp Erdoǵan saılaý aldynda Qara teńiz tabıǵı gazyn qurlyqqa shyǵaryp, bir jyl boıy turǵyndardyń turmysta qoldanatyn kógildir otynnyń aqysyz bolatynyn jarıalady. Qosymsha Gabarda taǵy da tabıǵı gaz kenishiniń tabylǵanyn aıtty. Otandyq kólik pen teńiz jáne áýe qorǵanys ónimderimen tanystyrdy. Al 11 mamyr kúni eń tómengi memlekettik qyzmetkerdiń jalaqysy shilde aıynan bastap 22 myń lıra bolatynyn málimdedi. Bul – bizdiń aqshaǵa shaqqanda 500 myń teńge.
«Biz zeınetkerden bastap memlekettik qyzmetshilerge, múgedekterden sheıitterdiń týystary men ardagerlerge deıin qoǵamymyzdyń barlyq toptaryn qoldadyq. Ekonomıkamyz ósken saıyn jasalǵan qosymsha qunnan búkil halqymyzdyń laıyqty úlesin alýyn qamtamasyz ettik. Elimiz basynan ótkergen aýyr qıynshylyqtarǵa, tabıǵı apattarǵa, jahandyq ekonomıkalyq daǵdarystarǵa jáne óńirimizdegi qaqtyǵystarǵa qaramastan, biz bul sezimtaldyqty saqtap qaldyq», - deıdi Túrkıa Prezıdenti Rejep Taıyp Erdoǵan.