Kámeletke tolmaǵan qyzdy anasy alaıaqtyq jolmen Túrkıaǵa alyp ketken
QR Oqý-aǵartý mınıstrliginiń Balalardyń quqyqtaryn qorǵaý komıteti Syrtqy ister mınıstrliginiń kómegimen Qazaqstan Respýblıkasynyń kámeletke tolmaǵan azamatyn Túrkıa Respýblıkasynan elge qaıtarý boıynsha jumys júrgizdi, dep habarlaıdy Zakon.kz.
16 jastaǵy Qazaqstan azamaty otanymyzǵa jetkizildi, qazir qyz otbasymen birge Aqtóbe qalasynda.
«16 jastaǵy Qazaqstan azamaty Bala quqyqtary jónindegi ýákil Arýjan Saınnan elge oralýyna kómek surady. Ótinishten kámeletke tolmaǵan qyzdy anasy alaıaqtyq jolmen Túrkıaǵa alyp ketkeni jáne onyń erkinen tys Ystambuldaǵy qyzdarǵa arnalǵan medresege bergeni anyqtaldy. Sonymen qatar bala týystarymen baılanysa almaı, Qazaqstanda júrgen ákesi men eki aǵasyn saǵynǵanyn aıtyp shaǵymdanǵan. Arýjan Saınnyń ótinishi negizinde QR Oqý-aǵartý mınıstrliginiń Balalardyń quqyqtaryn qorǵaý komıteti Qazaqstannyń Túrkıadaǵy elshiligi arqyly Ystambulda balany izdeý máselesin shuǵyl qolǵa aldy. QR Syrtqy ister mınıstrliginiń kómegimen bala tabylyp, onyń Qazaqstanǵa oralýyna qajetti kómek kórsetildi», -dedi Balalardyń quqyqtaryn qorǵaý komıtetiniń tóraǵasy Nasymjan Ospanova.
Balalardyń quqyqtaryn qorǵaý komıteti Qazaqstannyń kámeletke tolmaǵan azamattarynyń múddesi úshin jumysty odan ári jalǵastyra beretinin habarlaıdy.