Elimizdiń úlken qalalarynda túrik asqanalaryn da jıi kezdestiremiz. Degenmen Túrkıada da qazaqtyń ulttyq taǵamdaryna suranys joǵary eken. Buǵan sońǵy ýaqytta Ystambulda birneshe qazaq meıramhanasynyń ashylýy dálel, dep habarlaıdy Almaty-akshamy.kz.
Shveısarıalyq kásipker Harýn Túrkıada turatyn týystaryna jıi kelip turady. Kelgen saıyn qazaq taǵamdaryn izdep júrip jeıdi eken. Sebebi qazaqy mázirmen usynylǵan mundaı keń dastarhan basqa jerde joq deıdi.
«Men Shveısarıada turam. Álemniń kóptegen elderin araladym. Bir ret Almatyda boldym. Sol kezde qazaq taǵamdarynyń dámin alǵash ret tattym. Sodan beri qaı jerde qazaq meıramhanasy bolsa arnaıy baram. Sebebi sizderdiń qýyrdaq pen baýyrsaqqa jetetin taǵam joq», - deıdi Shveısarıa azamaty Harýn.
Ystambulda sońǵy bir jylda úsh birdeı qazaq meıramhanasy ashyldy. Sheteldiktermen qatar bul oryndarǵa eldiń dámin ańsaǵan qazaqstandyqtar da jıi keledi.
«Osymen ekinshi ret kelip turmyn. Taǵamdary erekshe. Ásirese, qymyzdyń qyshqyl dámin unattym. Sosyn meıramhananyń ishki bezendirýi qatty unady. Oıý-órnek, ádemi kórpeler. Quddy bir murajaıda otyrǵandaı bolasyń», - deıdi Ystambul qalasynyń turǵyny Mınýr Tas.
Álemge tanymal túrik taǵamdarymen básekelesý ońaı emes. Degenmen tabıǵı ári nárli ulttyq dastarhanymyzdy kez kelgen elde uıalmaı usyna alasyń deıdi osy kásipti dóńgeletip otyrǵan Danıar.
«Ózimizdiń ulttyq taǵamdarymyzdy, ulttyq dástúrimizdi osy Ystambulda kórsetkennen keıin, bul jaqta ózge ult ókilderi óte kóp. Ystambulǵa demalysqa kelip jatqandar óte kóp. Tek qazaqtarmen shektelip qalmaı ózge ulttarǵa da biz qonaq qylyp kútip jatqan jaıymyz bar. Bizdiń taǵamdar toıymdy ǵoı. Ásirese, er azamattarǵa biz delıkates dep aıtyp qoıamyz kúlip. Basqa ulttar kelip rızashylyǵyn bildirip ketedi», - deıdi kásipker Danıar Imanbaqov.
Álemde Italıa, Túrkıa men Qytaı asqanalary eń tanymal deıdi mamandar. Degenmen, áspetteı bilse, ulttyq taǵamdarymyzdy da dúnıejúzilik deńgeıge kóterýge bolady. Ár qaltarysynda bir dámhana bar Ystambulda qazaq taǵamdaryna suranystyń joǵary bolýy osyny meńzeıdi.