Halyqtyń osal toptaryna memleket jan-jaqty kómek kórsetedi, olardy qoldaýǵa mıllıardtaǵan qarjy shyǵyndalady.
Endi bul iske qoǵamnyń tek osy qabatyn ǵana qorǵaıtyn jeke ombýdsmen ınstıtýty paıda bolady, dep habarlaıdy Almaty-akshamy.kz
Eńbek jáne halyqty áleýmettik qorǵaý mınıstrligi eleń etkizetin qujatty jarıalady. Ol «Halyqtyń áleýmettik jaǵynan álsiz sanattary quqyqtary jónindegi ýákil ınstıtýtyn qurý týraly» Prezıdenttiń Ókiminiń jobasy dep atalady.
Aty aıtyp turǵandaı, oǵan Qasym-Jomart Toqaev qol qoıǵannan keıin Qazaqstanda tek qana HÁOT-tardy (halyqtyń áleýmettik osal toptaryn) qorǵaıtyn jańa ombýdsmen taǵaıyndalady.
«Qazaqstanda halyqtyń áleýmettik álsiz sanattarynyń quqyqtary men zańdy múddelerin qorǵaý júıesin jetildirý maqsatynda qaýly etemin: 1. Qazaqstanda óz qyzmetin qoǵamdyq bastamada júzege asyratyn Halyqtyń áleýmettik jaǵynan álsiz sanattary quqyqtary jónindegi ýákil ınstıtýty (budan ári – Ýákil) qurylsyn», – delingen ókim jobasynda.
Iaǵnı, qyzmeti búdjetten qarjylandyrylatyn, salmaqty jalaqy alatyn Adam quqyqtary jónindegi ýákilden aıyrmashylyǵy sol, jańa ombýdsmen jalaqysyz, qoǵamdyq negizde jumys isteıdi. Bul laýazym oǵan tek mártebe men ataq áperedi.
Qujatta jańa ýákildiń negizgi maqsaty «halyqtyń áleýmettik álsiz sanattarynyń quqyqtary men zańdy múddeleriniń negizgi kepildikterin qamtamasyz etý, sondaı-aq olardyń quqyqtary buzylǵan jaǵdaılarda qalpyna keltirý bolyp tabylatyny» atap kórsetilgen.
Ókimniń oryndalýyn baqylaý Prezıdent ákimshiligine júkteledi. Qujat qol qoıylǵan kúninen bastap qoldanysqa engiziledi.
Ókimde sóz bolyp otyrǵan HÁOT (oryssha SÝSN dep ataıdy) sanatyna jatatyndardyń qatary úlken, bular:
Uly Otan soǵysynyń qatysýshylary men múgedekteri;
Solarǵa teńestirilgen tulǵalar;
Birinshi jáne ekinshi toptaǵy múgedekter, múgedektigi bar balalardy tárbıeleýshi otbasylar;
Úkimet bekitken tizimde keltirilgen birqatar sozylmaly aýrýlardyń aýyr túrlerimen aýyratyn tulǵalar;
Zeınetkerler;
Jetim balalar, 29-ǵa tolmaǵan, ata-anasynyń qamqorlyǵynsyz qalǵan balalar;
Qandastar (oralmandar);
Ekologıalyq apat, tabıǵı jáne tehnogendik sıpattaǵy TJ saldarynan baspanasynan aıyrylǵan adamdar;
Kóp balaly analar, kóp balaly otbasylar;
Memlekettik, qoǵamdyq mindetterdi, áskerı qyzmetti oryndaý, qoǵamdyq tártipti qorǵaý kezinde qaza tapqan tulǵalardyń otbasylary;
Tolyq emes otbasylar, jalǵyzbasty analar.
Bul sanattaǵylardyń quramy qanshalyqty ár alýan bolsa, olardyń shaǵymy da árqıly bolyp keledi. Jańa ombýdsmenge sonyń bárimen aınalysýǵa týra kelmek.