Salymshylardyń shottarynda 13,97 trln teńge jınaqtalǵan.
BJZQ málimetterine sáıkes, 2022 jylǵy 1 qyrkúıektegi jaǵdaı boıynsha, salymshylardyń shottarynda 13,97 trln teńge jınaqtalǵan. Bir jyl ishinde bul soma 1,02 trln teńgege nemese 7,9%-ǵa ósti, dep habarlaıdy Almaty-akshamy.kz Egemen.kz silteme jasap.
Qorda atap ótkendeı, zeınetaqy jınaqtarynyń negizgi somasy mindetti zeınetaqy jarnalary esebinen qalyptasyp, 13,6 trln teńgeni qurady.
Mindetti kásiptik zeınetaqy jarnalary boıynsha zeınetaqy jınaqtarynyń somasy 416 mlrd teńgeni, erikti zeınetaqy jarnalary boıynsha zeınetaqy jınaqtarynyń somasy shamamen 3 mlrd teńgeni qurady.
«2022 jyldyń segiz aıynda salymshylardyń shottaryna shamamen 1,1 trln teńge kóleminde zeınetaqy jarnalary tústi, bul 2021 jyldyń uqsas kezeńindegi kórsetkishten 29%-ǵa nemese 246,7 mlrd teńgege asyp tústi. Jarnalardyń barlyq túrleri boıynsha ósim baıqalǵanyn atap ótý kerek. Jarnalardyń jalpy kóleminiń 95,3%-yn MZJ boıynsha BJZQ-ǵa túsimder quraıdy, bul - 1 trln teńge (sońǵy 12 aıda ósim 29%), MKZJ boıynsha 50,1 mlrd teńge (ósim 37%) tústi. 1,6 mlrd teńge (ósim 293%) EZJ boıynsha aýdaryldy»,- delingen BJZQ habarlamasynda.
BJZQ derekteri boıynsha zeınetaqy jınaqtarynyń aıtarlyqtaı ósýi 2022 jylǵy 1 qańtar men 1 qyrkúıek aralyǵynda 694,7 mlrd teńgeni quraǵan taza ınvestısıalyq tabys esebinen boldy.
1 qyrkúıektegi jaǵdaı boıynsha, BJZQ-daǵy jeke zeınetaqy shottarynyń sany 12 mln birlikti qurady. Shottardyń eń kóp sany mindetti zeınetaqy jarnalary boıynsha ashyldy, bul - 10 907 012 birlik. MKZJ esebinen qalyptastyrylǵan shottar sany - 581 410 birlik, EZJ esepke alý boıynsha JZSH 346 793 birlikke teń.
Sonymen qatar jyl basynan beri qor 1 trıllıon teńgeden astam qarajat tólegen. Tólemderdiń basym bóligi turǵyn úı jaǵdaıyn jaqsartýǵa jáne emdelýge baǵyttalǵan.
Jasyna baılanysty tólemder 75,9 mlrd teńgeni, muragerlik boıynsha tólemder - 43,2 mlrd teńgeni, Qazaqstan aýmaǵynan tys jerlerge turaqty turýǵa ketýge baılanysty tólemder - 34 mlrd teńgeni qurady, saqtandyrý uıymdaryna shamamen 17,5 mlrd teńge, jerleýge arnalǵan tólemder - 3,7 mlrd teńge jáne múgedektik boıynsha tólemder - 1,6 mlrd teńge aýdaryldy.
Sondaı-aq BJZQ keste boıynsha aı saıynǵy ortasha tólem somasy (zeınetkerlik jasqa tolýyna baılanysty) 29 859 teńgeni, al aı saıynǵy eń joǵary tólem somasy 707 326 teńgeni quraǵanyn habarlady.