Ystambulda myńnan astam jolaýshy qalyp qoıǵan
Túrkıada qalyp qoıǵan qazaqstandyqtardy elge jetkizý aıaqtaldy. Bul týraly Qazaqstannyń Ystambuldaǵy Bas konsýly Álim Baıel málimdedi, dep habarlaıdy Almaty-akshamy.kz «Habar 24» telearnasyna silteme jasap.
2022 jyldyń 5 qańtarynan bastap tek Ystambulda myńnan astam jolaýshy qalyp qoıǵan. Osyǵan baılanysty, Qazaqstannyń Túrkıadaǵy Elshiligi men Ystambuldaǵy Bas konsýldyǵy azamattarǵa aqparattyq, quqyqtyq jáne materıaldyq kómek kórsetý boıynsha jedel shtab quryp, jan-jaqty qoldaýdy kórsetti.
Bas konsýldyq áleýmettik paraqshalarda azamattardy olardyń Qazaqstanǵa oralýy týraly ýaqtyly habardar etý úshin arnaıy habarlama chattaryn iske qosty. Ystambuldyń eki áýejaıynda da azamattarǵa qajetti kómek kórsetý maqsatynda konsýldyq qyzmetkerleriniń kezekshiligi uıymdastyryldy. Qazaqstanǵa Ózbekstan, Qyrǵyzstan jáne Reseı arqyly jetýge sheshim qabyldaǵan azamattarǵa bılet satyp alý, sondaı-aq, olardyń qozǵalysyn QR-nyń tıisti elderdegi sheteldik mekemelerimen úılestirý boıynsha kómek kórsetildi.
Bas konsýldyq reısterdi kútý kezinde asa muqtaj 154 jolaýshyny qaladaǵy qonaqúılerde aqysyz ornalastyrdy. Eriktiler men Ystambuldaǵy qazaq dıasporasynyń ókilderi 100-den astam otandasymyzdy ystyq tamaq pen jyly tósekpen qamtamasyz etti. Sondaı-aq, dıplomattardyń úılestirýimen 300-den astam jolaýshy ystyq tamaqpen, 200-ge jýyq jolaýshyǵa qala ishinde arnaıy tasymal kólikteri qyzmet kórsetti.
Qazaqstandyq dıplomattar áýe kompanıalarymen turaqty baılanysta bolyp, reısterdi tez arada qalpyna keltirý jóninde kelissózder júrgizdi. Jaǵdaıdyń turaqtanýyna qaraı Qazaqstanǵa áýe reısteri qalpyna kele bastady. Bas konsýldyq reısteri oryndalmaǵan barlyq jolaýshylardy elge jetkizý úshin azamattar men áýe kompanıalarynyń áreketterin úılestirdi. 15 qańtardaǵy jaǵdaıǵa sáıkes, Ystambuldan Qazaqstannyń túrli qalalaryna 2500-den astam qazaqstandyq ushqan. Antalıada qalyp qoıǵan qazaqstandyqtardyń da barlyǵy derlik elge jetkizildi.
Máselen, Bas konsýldyqtyń Túrik áýe joldarymen kelisimi boıynsha 11 qańtarda Almatyǵa 151 azamat oraldy, onyń ishinde 75 jolaýshy bortqa aqysyz qabyldandy. Qazirgi ýaqytta barlyq áýe kompanıalary (Air Astana, Túrik áýe joldary, FlyArystan, Scat jáne t.b.) reısterin óz kestelerine sáıkes shtattyq rejımde oryndaýda. Túrkıadan kelgen jolaýshylardy Almaty áýejaıy da qabyldaýda.