Gazıantep qalasynda 8 medısına qyzmetkeri jumys istedi
Túrkıadaǵy qaıǵyly oqıǵa kezinde apat oshaqtarynda qutqarýshylarmen birge para medısına qyzmetkerleri de jumys istedi. QR Tótenshe jaǵdaılar mınıstrligi Almaty qalasy boıynsha Apattar medısınasy ortalyǵynyń basshysy Jazylbaı Qozybahov Óńirlik komýnıkasıalar qyzmeti alańynda qutqarý jumystaryna qosqan úlesi týraly aıtyp berdi, dep habarlaıdy Almaty-akshamy.kz.
«6 aqpanda bizge tapsyrma berildi, Almaty qalasyndaǵy fılıalda bes adamnan turatyn biriktirilgen medısınalyq top qurýdy bastadyq. Qajetti dári-dármekterdi, medısınalyq qural-jabdyqtardy, múlikterdi daıyndap, bortqa tıep, 7 aqpanda Túrkıa Respýblıkasyna, Gazıantep qalasyna ushtyq», - dedi spıker.
Ol jaqqa jetkennen keıin bir top medısına qyzmetkeri medısınalyq pýnkt pen jylytý pýnktin ornatty. Alǵashqy kúnderden bastap Túrkıa azamattary, onyń ishinde jergilikti turǵyndary jáne bizdiń qutqarýshylar, quqyq qorǵaý organdarynyń qyzmetkerleri dárigerlerge júgine bastady. Qutqarý jumystary júrgizilgen jalpy kezeńde almatylyq dárigerler júzden astam adamǵa kómek kórsetti, onyń ishinde 80-nen astamy - Túrkıa azamattary. Spıkerdiń aıtýynsha, medısınalyq kómekke júgingenderdiń kóbiniń jaraqattary jeńil, kópshiligi júıke jáne tynys alý organdarynyń aýrýlaryna shaǵymdanǵan.
«Bizdiń qutqarýshylar da medısınalyq kómekke júgindi. Kóbinese aýyr fızıkalyq jumysqa baılanysty shaǵyn jaraqattanýlar boldy. Bolmashy jaralar, azdaǵan qantalaýlar jáne t.b. Jergilikti turǵyndardan negizinen kúızeliske baılanysty shaǵymdar bolǵan, qatty sharshaý, sýyq tıý belgileri de baıqalǵan», - dep túsindirdi J.Qozybahov.
Túrkıaǵa Tótenshe jaǵdaılar mınıstrliginen barlyǵy 10 dáriger bardy. Gazıantep qalasynda 8 medısına qyzmetkeri jumys istedi - bul feldsher-dárigerler jáne ekeýi Nurdaǵy qalasynda jumys istedi. Bizdiń dárigerlerdiń basty mindeti apat kezinde zardap shekkenderge medısınalyq kómek kórsetý, sonymen qatar qutqarýshylarymyzǵa medısınalyq kómek kórsetý boldy.
Apattar medısınasy ortalyǵynyń basshysy atap ótkendeı, osy ýaqyt ishinde almatylyqtar úlken tájirıbe jınaqtady, qajettilik týyndaǵan jaǵdaıda basqa jerlerde jáne elderde de qoldanylatyn bolady.
«Dárigerlik-feldsherlik quram táýlik boıy jumys istedi, biz qutqarýshylardyń jumysyna qaraı jumys isteýge tyrystyq. Olardyń qandaı aýyr fızıkalyq, emosıonaldyq eńbekpen aınalysatynyn kórdik. Olardyń jetken jetistikterine, adamdardyń qutqarýshylarǵa kelip qalaı alǵystaryn bildirgenine kýá boldyq. Barlyq praktıkalyq kelissózder, barlyq kezdesýler bizdiń palatada ótti. Biz bolǵan oqıǵanyń bárine eriksiz kýá boldyq. Tipti, adamdar kelip alǵystaryn bildirip jatty. Túrik qutqarýshylary qalaı jáne ne isteý kerektigi jóninde bizdiń qutqarýshylarmen keńesti», - dedi ol.
Almatydan Túrkıadaǵy joıqyn jer silkinisi bolǵan jerlerge barlyǵy 33 adam, Apattar medısınasy ortalyǵynan 5 maman bardy.