İshki ister mınıstriniń mindetin atqarýshy Erlan Turǵymbaev jalǵan aqparat taratqandar jazaǵa tartylatynyn eskertti, dep habarlaıdy Almaty-akshamy.kz.
Turǵymbaev qazaqstandyqtardy shekteý sharalaryna shydamdyq tanytyp, saq bolýǵa, kúdikti derekter týraly polısıaǵa habarlaýǵa shaqyrdy.
«Ásirese, lańkesterge qarsy áreket ornynda saq bolýdy, arandatýǵa berilmeı, barlyq kúdikti derekterdi polısıaǵa habarlaýdy suraımyn. Bul arqyly elimizdegi tártipti qalypqa keltirýde quqyq qorǵaý organdaryna úlken kómek beresizder», - dedi Turǵymbaev.
Ol mundaı qıyn ýaqytta kórineý jalǵan aqparat taratýǵa bolmaıtynyn, al ondaı derek tirkelse, polısıa áreket etetinin eskertti.
«Memlekettik jáne ishki ister organdarynyń resmı derekkózderine sený kerek. TJ kezinde jalǵan aqparat taratqandar QK 274-baby, 4-bóligine sáıkes, úsh jyldan jeti jylǵa deıin sottalady», - dedi İshki ister mınıstriniń mindetin atqarýshy.