Almatyda perınataldyq kómektiń jańa standarttary engizildi

Almatynda respýblıka boıynsha alǵash ret bosandyrý stasıonarynda magnıttik-rezonanstyq tomografıa (MRT) kabıneti ashylyp, neonataldyq skrınıng zerthanasy engizildi.
 
Jańa medısınalyq múmkindikter Almaty qalasynyń Qoǵamdyq densaýlyq saqtaý basqarmasy basshysy Marat Pashımovtyń jumys sapary barysynda Qalalyq perınataldyq ortalyqta tanystyryldy.
 
Sapar barysynda Qalalyq perınataldyq ortalyq dırektory Álıa Aımaǵambetova 2025 jyldyń qorytyndysy boıynsha esep berdi. Talqylaýǵa Qoǵamdyq densaýlyq saqtaý basqarmasy basshysynyń orynbasary Leıla Imanǵalıeva jáne Ana men bala densaýlyǵyn qorǵaý bóliminiń basshysy Jadyra Ahmetova qatysty.
 
2025 jyldyń qorytyndysy boıynsha ortalyq perınataldyq kómektiń III deńgeıdegi jetekshi medısınalyq uıymy mártebesin rastady.
 
Barlyq nysanaly klınıkalyq ındıkator oryndaldy: jańa týǵan náresteniń jalpy ómirsheńdigi 100%-ǵa jýyqtady. Materıaldyq-tehnıkalyq bazanyń jaraqtandyrylý deńgeıi 97,3% boldy. Perzenthanaǵa júgingender sany 22,5 myń jaǵdaıǵa deıin artty, emdelip shyqqan pasıentter sany 15,5 myńnan asty.
 
Jyldyń basty oqıǵasy — elimizdiń medısınalyq tájirıbesinde alǵash ret bosandyrý stasıonarynyń ózinde MRT kabınetin ashý boldy. Bul júkti áıelder men bosanatyn analarǵa basqa medısınalyq uıymdarǵa barmaı-aq joǵary dáldiktegi dıagnostıkalyq zertteý júrgizýge múmkindik beredi, ásirese asqynǵan jáne shuǵyl jaǵdaıda asa mańyzdy. Sonymen qatar, neonataldyq skrınıng zerthanasy iske qosylyp, jańa týǵan sábıdegi týa bitken jáne tuqym qýalaıtyn aýrýlardy erte anyqtaý múmkindigi keńeıtilip, emdeýdi barynsha erte merzimde bastaýǵa jol ashyldy.
 
Ortalyqta 516 qyzmetker eńbek etedi, shtattyń jınaqtalý deńgeıi 98,8%. Ujym quramynda medısına ǵylymdarynyń doktorlary men kandıdattary, qoǵamdyq densaýlyq saqtaý salasynyń 18 magıstri, joǵary bilimdi akýsherler men medısınalyq meıirbıkeler bar. 2025 jyly qyzmetkerlerdiń 100%-y oqytýdan ótti, onyń ishinde klınıkalyq daıarlyq, dıagnostıka, ınfeksıalyq jáne radıasıalyq qaýipsizdik, shuǵyl jáne krıtıkalyq jaǵdaıda medısınalyq kómek kórsetý baǵyttary qamtyldy. Mamandar halyqaralyq, respýblıkalyq jáne óńirlik ǵylymı-tájirıbelik is-sharalarǵa qatysyp, Qazaqstannyń, TMD elderiniń jáne alys shetelderdiń jetekshi medısınalyq ortalyqtarynda bilimin jetildirdi.
 
MRT men neonataldyq skrınıngten bólek, byltyr ortalyq sterılızasıalaý bólimshesine renovasıa júrgizildi, gospıtáldyq farmasıa jáne dárilik qamtamasyz etý bólimi quryldy, joǵary tehnologıalyq gınekologıalyq otaladyń kólemi artty, sımýlásıalyq ortalyq pen sıfrlyq medısına damytylyp keledi.
 
Sapar qorytyndysy boıynsha Marat Pashımov aýyr aǵymdaǵy júktiligi bar árbir pasıentti turaqty baqylaýda ustaýdy, shuǵyl túrde konsılıým uıymdastyrýdy jáne medısınalyq kómekti kórsetýdiń zamanaýı tásilderi men ınovasıasyn qalyptastyrýda bas shtattan tys akýsher-gınekologtyń rólin kúsheıtýdi tapsyrdy.