Prezıdent Qasym-Jomart Toqaev Qazaqstan Respýblıkasy Konstıtýsıasynyń 30 jyldyǵyna arnalǵan "Konstıtýsıa jáne memlekettilik: quqyq pen bolashaq dıalogy" atty ǵylymı-praktıkalyq konferensıada sóz sóıledi, - dep habarlaıdy Aqshamnews.kz tilshisi.
"Búgingi jıynnyń mán-mańyzy aıryqsha. Osydan 30 jyl buryn búkilhalyqtyq referendýmda Qazaqstan Respýblıkasynyń Konstıtýsıasy qabyldandy. Bul egemen elimiz úshin tarıhı sát boldy. Barshańyzǵa qutty bolsyn deımin. Shyn máninde, Ata zańnan bıik eshteńe joq", - dedi Memleket basshysy.
Prezıdenttiń aıtýynsha, sebebi Konstıtýsıa – memlekettigimizdiń myzǵymas tuǵyry, Táýelsizdigimizdiń aınymas temirqazyǵy.
"Qazaq – Uly dala zańyna bas ıgen, ar-uıattan attamaǵan halyq. Qasym hannyń qasqa joly, Esim hannyń eski joly, Áz Táýkeniń Jeti jarǵysy – naǵyz dala zańynyń jarqyn úlgileri. Osy dástúr eshqashan úzilgen emes. Jurtymyz dala zańynan qazirgi Ata zańyna deıin tarıhı joldan ótti. Ótken ǵasyrdyń basynda qazaq zıalylary bul iske eleýli úles qosty. Keńes zamanynda elimizdiń quqyqtyq irgetasy qalandy, bilikti zańgerler shoǵyry paıda boldy", - dedi Toqaev.