Toqaev Parlamenttik reforma jónindegi jumys tobynyń otyrysyn ótkizdi
Memleket basshysy Jumys tobymen birge konstıtýsıalyq reformaǵa qatysty negizgi tásilderdi talqylady, - dep habarlaıdy aqshamnews.kz
Astanada Prezıdent Qasym-Jomart Toqaevtyń qatysýymen Parlamenttik reforma jónindegi jumys tobynyń otyrysy ótti.
Jıynda Memlekettik keńesshi Erlan Qarın Prezıdentke Jumys tobynyń atqarǵan qyzmeti týraly baıandap, Parlamentti transformasıalaýǵa qatysty usynylyp otyrǵan konstıtýsıalyq ózgeristerdiń kólemi aýqymdy ekenine nazar aýdardy.
Memlekettik keńesshi Jumys toby músheleriniń ortaq pikirin jetkizip, bul ózgerister saıası júıeni ýaqyt talabyna saı jańǵyrtýǵa yqpal etetinin aıtty.
Prezıdenttiń quqyqtyq máseleler jónindegi kómekshisi Erjan Jıenbaev azamattardan kelip túsken usynystar negizinde Konstıtýsıalyq reforma jónindegi jumys toby músheleri ázirlegen basty tásilder týraly baıandady.
Atap aıtqanda, byltyrǵy qazan aıynan beri ótip kele jatqan otyrystarda jańa Parlamentke qatysty máselelerdiń bári qaraldy. Onyń ishinde depýtattar sany, ókilettik merzimderi, saılaý tártibi, bir palataly Parlamenttiń zań shyǵarý tetikteri, sondaı-aq onyń bıliktiń ózge ınstıtýttarymen ózara is-qımyl máseleleri qamtyldy.
Parlamentarızm ınstıtýtynyń dırektory Natalá Pan azamattardan, sarapshylardan, qoǵamdyq birlestikterden e-Otinish jáne eGov platformalary arqyly kelip túsken usynystar týraly aqparat berdi
Birneshe aı ishinde saıası partıalardyń barlyǵy, ondaǵan úkimettik emes uıym, bıznes-qoǵamdastyq ókilderi, quqyqtanýshy ǵalymdar men sarapshylar konstıtýsıalyq reformaǵa qatysty óz bastamalaryn joldaǵan.
Parlamenttik reformadan bólek, Jumys tobyna azamattardan memlekettik qurylymnyń jalpy máseleleri men saıası jáne qoǵamdyq ınstıtýttardy jetildirýge qatysty 1,6 myńǵa jýyq usynys kelip tústi.
Parlament Májilisindegi «Amanat» partıasy fraksıasynyń jetekshisi Elnur Beısenbaev jáne «Aq jol» partıasynyń kóshbasshysy Azat Perýashev, «Jalpyulttyq sosıal-demokratıalyq partıa» fraksıasynyń basshysy Asqat Rahymjanov parlamenttik reforma aıasynda júzege asyrylatyn konstıtýsıalyq ózgeristerdiń aýqymdy ekenin málimdedi.
Olar óńirlerde Parlament depýtattarynyń jumys kezdesýleri barysynda azamattardyń aldaǵy saıası reformaǵa aıryqsha qyzyǵýshylyq tanytyp otyrǵanyn jetkizdi.
Sondaı-aq jıynda Parlament Senatynyń Konstıtýsıalyq zańnama, sot júıesi jáne quqyq qorǵaý organdary komıtetiniń tóraǵasy Nurlan Beknazarov, Parlament Májilisiniń depýtattary Únzıla Shapaq, Marat Báshimov, Nıkıta Shatalov, saıasattanýshy Bórihan Nurmuhamedov pikirlerin bildirdi.
Otyrysty qorytyndylaǵan Memleket basshysy aldaǵy konstıtýsıalyq reformany talqylaý bastalǵaly beri jarty jylǵa jýyq ýaqyt ótkenin eske saldy
Osy kezeń ishinde qoǵamda eldiń joǵary zań shyǵarýshy organyn transformasıalaýdyń maqsattary men mindetterine qatysty durys túsinik qalyptasty.
Qasym-Jomart Toqaev qyrkúıek aıyndaǵy halyqqa arnaǵan Joldaýynan keıin órbigen qoǵamdyq pikirtalastardy muqıat qadaǵalap otyrǵanyn jetkizdi.
Memleket basshysy talqylaý nátıjesin, saraptama qorytyndylaryn, usynylǵan túzetýlerdiń jobalaryn, sondaı-aq konstıtýsıalyq reformaǵa qatysty azamattardan kelip túsken usynystardy egjeı-tegjeıli zerdeleýde.
Saıası júıeni odan ári reformalaýdyń mańyzy men mazmunyna toqtalǵan Prezıdent ınstıtýsıonaldyq negizdi tereń jańǵyrtý jáne zań shyǵarýshy bılik tarmaǵyn júıeli túrde qaıta formattaý qajet ekenin aıtty
"Erteń Ulttyq quryltaı otyrysynda men elimizdiń taǵdyryna qatysty bul másele boıynsha naqty pikirlerimdi aıtamyn. Naqtylaı aıtqanda, elimizdiń sapalyq turǵydan múldem jańa saıası turpaty qalyptasyp jatyr. Parlamenttik reformany júzege asyrý úshin Konstıtýsıanyń birden birneshe bólimin qaıta qaraý qajet bolady. Sondyqtan Ata zańymyzǵa osyǵan deıin engizilgen ózgertýlerdi eskersek, Jumys toby usynyp otyrǵan túzetýler jobasy Qazaqstannyń shyn máninde jańa Konstıtýsıasy týraly aıtýǵa múmkindik beredi", – dedi Memleket basshysy.