Ulttyq quryltaıdyń tórt otyrysynda kóterilgen usynystardyń eń ólshenetin nátıjesi – zańnamalyq ózgerister. Ulytaý, Túrkistan, Atyraý jáne Býrabaıdaǵy jıyndardan keıin qoǵam suranysy birtindep quqyqtyq normaǵa aınalyp, barlyǵy 26 zań qabyldandy, - dep habarlıdy aqshamnews.kz tilshisi.
Ulytaýda ótken I Quryltaıdyń basty zańnamalyq sheshimi – 25 qazanǵa Respýblıka kúni retinde ulttyq mereke mártebesin berý boldy.
Túrkistandaǵy II Quryltaı nátıjesinde:
1. "Túrkistan qalasynyń erekshe mártebesi týraly" Zań;
2. "Qazaqstannyń Halyq jazýshysy" ataǵyn qaıtarý;
3. "Kınematografıa týraly" Zańǵa túzetýler;
4. Onomastıka jumysyn júıeleý týraly;
5. Veıpterge, shegýge kelmeıtin temeki ónimderine tyıym salý týraly túzetýler;
6. Qumar oıyn bıznesi, lotereıalar jáne lotereıa qyzmeti máseleleri týraly;
7. Jumysshy mamandyqtar úshin jańadan 9 qurmetti ataq engizý;
8. Mass-medıa máseleleri týraly zańnamaǵa túzetýler;
9. "Onlaın-platformalar jáne onlaın-jarnama týraly" Zań;
10. Memlekettik nagradalarǵa uqsas qoǵamdyq nagradalardy daıyndaýǵa jáne marapattaýǵa tyıym salatyn zań;
11. Ǵylym jáne bilim berý máseleleri týraly zańnamaǵa túzetýler (pedagogterge qosymsha tólemder týraly) qarastyryldy.
Atyraýda ótken III Quryltaıdyń zańnamalyq nátıjeleri qaýipsizdik, tártip jáne qundylyqtar taqyrybyn kúsheıtti: "Aıbyn" ordenine ańyzǵa aınalǵan qaharmandar – Saǵadat Nurmaǵambetov, Baýyrjan Momyshuly, Rahymjan Qoshqarbaev esimderin berý týraly túzetýler qabyldandy. Qoǵamdyq keńistikti qorǵaý úshin vandalızmge qarsy kúres jáne tabıǵı nysandardy qorǵaý jónindegi túzetýler engizildi.
1. Lısenzıalaýdy retke keltirý jáne zańsyz arheologıalyq qazbalarǵa qatysty jaýapkershilikti kúsheıtý týraly túzetýler;
2. Esirtki tasymaldaýshylar men esirtki óndirýshilerdiń jaýapkershiligin saralaý týraly túzetýler;
3. Áıelderdiń quqyqtaryn qamtamasyz etý jáne balalar qaýipsizdigi máseleleri týraly túzetýler (turmystyq zorlyq-zombylyqqa qatysty qylmystyq jaýapkershilikke tartý, balalarǵa qatysty zorlyqtyń barlyq túrine jazany qatańdatý jáne t.b.);
4. Óńirlik rámizderdiń biryńǵaı standarty týraly túzetýler;
5. "Memlekettik jastar saıasaty týraly" Zańǵa túzetýler;
6. Kreatıvti ındýstrıany qoldaýǵa baǵyttalǵan zańnamalyq sharalar paketi.
Býrabaıdaǵy IV Quryltaı qorytyndysy qoǵamdyq tártip pen aqparattyq keńistiktegi jaýapkershilikti kúsheıtýge baǵyttaldy: qoǵamdyq oryndarda bet-beıneni tanýǵa kedergi keltiretin kıim kıýge qatysty ákimshilik jaýapkershilik engizý, sondaı-aq quqyqqa qaıshy kontentti, onyń ishinde ultaralyq jáne dinı arazdyqty qozdyrýǵa baǵyttalǵan materıaldardy taratqany úshin ákimshilik jaýapkershilik engizý boıynsha sheshim qabyldandy. Sonymen qatar LGBT men pedofılıany nasıhattaýǵa qatysty jaýapkershilik engizý bastamasy da osy paketke kirdi. Balalar quqyǵyn qorǵaý baǵytynda áıelderdiń quqyqtaryn qamtamasyz etý jáne balalar qaýipsizdigi jónindegi túzetýlerdiń kelesi toptamasy qabyldanyp, qamqorshylyq organdaryn kúsheıtý jáne balalardyń quqyqtaryn qorǵaýdy nyǵaıtatyn qosymsha sharalar qarastyryldy. Onomastıka baǵyty qaıtadan jalǵasyp, onomastıka salasyndaǵy jumysty retke keltirý qabyldandy. Ǵylym men óńirlik yntymaqtastyq turǵysynan Qazaqstandaǵy Ortalyq Azıa óńirlik glásıologıalyq ortalyǵynyń mártebesin qaıta jandandyrý týraly sheshim zańnamalyq deńgeıde bekitildi.