Úkimet jospary.
Qazaqstandaǵy tótenshe jaǵdaı mamandaryna qosymsha aqy tólenedi. Bul týraly mınıstr Iýrıı Ilın málimdedi, dep habarlaıdyAlmaty-akshamy.kz Baq.kz silteme jasap.
«Qazir birinshiden, Memleket basshysynyń tapsyrmasy boıynsha biz Ulttyq ekonomıka jáne Qarjy mınıstrlikterindegi áriptesterimizben kelesi jyldyń 1 qańtarynan bastap qyzmetkerlerimizdiń jalaqysyn kóterý týraly Premer-Mınıstrge hat jazyp, qol qoıýǵa jiberdik. Sol hatta tótenshe jaǵdaıdy joıý kezindegi jumystardyń kúrdeliligine qaraı qosymsha ústemaqy tóleýdi qarastyryp otyrmyz. Sondyqtan ondaı jumystar QR aýmaǵynda jáne odan tys jerlerde júrgizilse, aqy tólenedi», - dedi vedomstvo basshysy Senat otyrysynan keıin kýlýarda tilshilerge bergen suhbatynda.
Sonymen qatar mınıstr ústemaqynyń somasyna toqtaldy.
«Tólenetin ústemaqy somasy qyzmettik jalaqynyń paıyzdyq araqatynasyna baılanysty. Biz qazirgi ýaqytta ótinishte jalaqynyń 20 paıyzy dep kórsettik. Eger qyzmettik jalaqyny joǵary kótersek, asa kúrdeli jumystarda ár jumys kúni úshin bul orta eseppen 30 myń teńgege sáıkes keledi», - dedi Iýrıı Ilın.