«Qazaqtelekom» AQ men Qatar eliniń Power International Holding W.L.L. kompanıasy «MT-S» satyp alý sharttaryn aıqyndaıtyn qaǵıdattar týraly kelisimge qol qoıdy, dep habarlaıdy almaty-akshamy.kz «Qazaqtelekom» AQ-nyń Komýnıkasıalar departamentine silteme jasap.
Qazaqstannyń iri telekomýnıkasıalyq operatory «Qazaqtelekom» óziniń mobıldi aktıvteriniń biri – «Mobaıl Telekom-Servıs» JSHS (Tele2/ALTEL brendteri) Taıaý Shyǵystyń jetekshi konglomeraty – qatarlyq Power International Holding-ke satýdy kózdep otyr. Qaǵıdattar týraly úsh jaqty kelisimge («Samuryq-Qazyna» AQ) taraptar Qazaqstan Prezıdentiniń Qatar eline resmı sapary sheńberinde qol qoıyldy.
«Kelissózderdi jaqynda ǵana bastadyq, árıne, búgin Power International Holding kompanıasymen aldyn-ala kelisimge keldik, aldaǵy ýaqytta satý-satyp alýdyń barlyq sharttary men rásimderin talqylap, bekitý qajet bolady, sondyqtan naqty san, mámile somasy jáne t. b. týraly aıtýǵa áli erte. Biz strategıalyq ınvestor retinde Pih sıaqty bedeldi jáne turaqty kompanıanyń nıet bildirgenine rızamyz, onyń ústine kompanıa Qazaqstanda áıgili bolyp tabylady, elimizde holdıńtiń kóptegen jobalary bar, ári olardyń barlyǵy aıtarlyqtaı tabysty», - dep atap ótti «Qazaqtelekom» AQ Basqarma Tóraǵasy Qýanyshbek Esekeev.
Power International Holding – bul ekonomıkanyń túrli sektorlaryn qamtıtyn Katar konglomeraty. Kompanıada 65 myńǵa jýyq qyzmetker jumys isteıdi, álem boıynsha 1000-ǵa jýyq túrli jobalar iske asyrylýda. Máselen, 2022 jyldyń qazan aıynda Katar Ámiriniń Qazaqstanǵa resmı sapary aıasynda holdıń Astanada quny 300 mıllıon dollarǵa jýyq iri halyqaralyq medısınalyq keshen salý týraly Memorandýmǵa qol qoıǵan bolatyn.
«Biz Qazaqstanda uıaly baılanys operatoryn satyp alý týraly kelisimge qol qoıǵanymyzǵa, ári ınvestısıalyq ahýaly óte qolaıly jáne iskerlik orta damyǵan sizdiń elińizde Pih bıznesin keńeıtip jatqanymyzǵa óte qýanyshtymyz» - dedi Power International Holding W. L. L. Tóraǵasy Muhammed Mýtaz Ál-Haııat.
Eske salsaq, 2019 jyly «Qazaqtelekom» «MT-S» -tyń 100% úlesin ıelengen bolatyn. Búginde bul Qazaqstandaǵy eń iri uıaly baılanys operatory, onyń telekom-qyzmetteri men sıfrlyq servısterin 7 mıllıonǵa jýyq adam paıdalanady. Kompanıa konsorsıýmǵa qatysýshylardyń biri bolyp tabylady, ol bizdiń elimizde besinshi býyn baılanys standartyn óristetý jobasyn iske asyrýda, ári byltyr ǵana respýblıkanyń 20 shaqty qalasynda 800-ge tarta 5G bazalyq stansıasyn saldy, bazalyq stansıalardyń jalpy sany 7 myńnan asady.