Almatyda halyqtyń áleýmettik osal toptary sanatyndaǵy balalar oqý jylynyń basynan bastap memlekettik balabaqshalarda tegin tamaqpen qamtamasyz etildi
Memleket basshysynyń saılaýaldy baǵdarlamasyn iske asyrý aıasynda Almaty qalasynyń ákimi Erbolat Dosaevtyń qaýlysymen 2023 jylǵy 1 qyrkúıekten bastap halyqtyń áleýmettik osal toptarynan shyqqan balalar memlekettik balabaqshalarda tegin tamaqpen qamtamasyz etildi.
Almaty qalasy bilim basqarmasynyń basshysy Lázzat Jylqybaevanyń aıtýynsha, qazir megapolıste 80 myńǵa jýyq bala (194 memlekettik jáne 1 respýblıkalyq – 39 862 bala; 723 jekemenshik - 39 738 bala) baratyn 918 mektepke deıingi uıym jumys isteıdi. Almaty boıynsha 3 jastan 6 jasqa deıingi balalardyń 93,4%-y mektepke deıingi tárbıemen jáne oqytýmen qamtylǵan.
Balalardy mektepke deıingi bilimmen qamtýdy arttyrý maqsatynda 2023 jyldyń basynan bastap 3 801 orynǵa mektepke deıingi tárbıe men oqytýǵa memlekettik bilim berý tapsyrysyn ornalastyrýǵa 2 baıqaý ótkizildi.
«Qazirgi ýaqytta Almaty qalasy boıynsha halyqtyń áleýmettik osal toptarynan 5672 bala tegin tamaqpen qamtyldy. Baǵdarlamany iske asyrý úshin Almaty qalasy máslıhatynyń sheshimimen jergilikti búdjetten qarajat bólindi», - dedi Lázzat Jylqybaeva.
Tegin tamaqpen qamtylǵan balalar sanattaryna mynalar jatady:
-jetim balalar men ata-anasynyń qamqorlyǵynsyz qalǵan balalar;
- birinshi jáne ekinshi toptaǵy múgedektigi bar adamdar, bala kezinen múgedektigi bar adamdar, múgedektigi bar balalar;
- kópbalaly otbasylardan shyqqan balalar;
- ataýly áleýmettik kómek alýǵa quqyǵy bar otbasylardan shyqqan balalar.