Ál-Farabı atyndaǵy Qazaq ulttyq ýnıversıtetiniń ekohabynda «Taza Qazaqstan» bastamasy aıasynda «Zero Waste Campus» baǵdarlamasynyń is-sharalary ótip jatyr. Joba kampýstarda qaldyqsyz ómir saltyn nasıhattaýǵa jáne stýdentter arasynda ekologıalyq mádenıetti qalyptastyrýǵa baǵyttalǵan.
Qatysýshylar «Zero Waste» qaǵıdalarymen tanysyp, qaldyqtardy suryptaý boıynsha tájirıbeden ótti. Plasıkalyq qaldyqtardy qaıta óńdeý úlgileri kórsetilip, sanaly tutyný mádenıeti túsindirildi. Stýdentter bótelke qaqpaqtaryn suryptap, arnaıy sehtaǵy usaqtaý jáne túrli-tústi plıtalarǵa aınaldyrý prosesin baqylady. Osy plıtalardan ústel, oryndyq, ınterer buıymdary jasalady.
Kampýs aýmaǵyna qaldyqtardy bólek jınaıtyn fandomattar ornatylǵan. «ECO Network» kompanıasynyń jobalar jetekshisi Hamza Safarovtyń aıtýynsha, ekohab – kompanıa men QazUÝ arasyndaǵy tabysty yntymaqtastyqtyń jemisi. Munda kez kelgen adam qaldyqtaryn ótkizip, olardan daıyndalǵan buıymdar jasaı alady. Sonymen qatar jasyl ekonomıka taqyrybynda sheberlik sabaqtary men ınteraktıvti oqytý ótkiziledi.
Jobany úılestirýshi, IýNESKO-nyń turaqty damý kafedrasynyń aǵa oqytýshysy Áıgerim Kerimqulova bıyl ekohab jumysyna júzdegen stýdentterdiń tartylǵanyn aıtty. Al stýdentterdiń ózderi ekologıalyq bastamanyń mańyzyn erekshe atap ótti:
-
Madına Estaeva, jýrnalısıka fakúltetiniń 1-kýrs stýdenti:
«Ekohab jaı ǵana aksıa emes, ol – ekologıalyq mádenıet qalyptastyrýdyń naqty qadamy. Qaldyqtardy qaıta óńdeý arqyly biz klımatqa keletin zıandy azaıtamyz». -
Ramına Ibragımova, ekologıa fakúltetiniń 1-kýrs stýdenti:
«Bul tájirıbe men úshin óte qundy. Volonter retinde qaldyqtardy suryptaý – bolashaq mamandyǵym úshin úlken mektep».
QazUÝ ekohaby jastardyń ekologıa salasyndaǵy tájirıbe almasý jáne dıalog alańyna aınaldy. «Zero Waste Campus» bastamasy – taza ári turaqty bolashaqqa qadam jáne stýdentterdiń tabıǵatty qorǵaýdaǵy belsendiliginiń aıqyn dáleli.