Belsendi, shyǵarmashyl jastardy qoldaý
Elimizde daryndy, ıdeıashyl jastarǵa qoldaý jan-jaqty kórsetilip keledi. Táýelsizdik jyldary dúnıege kelgen daryndy jastarǵa naqty qoldaý retinde memleket basshysy Qasym-Jomart Toqaevtyń bastamasymen «Táýelsizdik urpaqtary» atty grant taǵaıyndaý qajettigi aıtylǵan bolatyn, dep habarlaıdy almaty-akshamy.kz.
Prezıdenttiń osy tapsyrmasyn iske asyrý maqsatynda konkýrstyń uıymdastyrýshysy retinde Aqparat jáne qoǵamdyq damý mınıstrligi 2021 jyldyń 8 shildesinde Úkimet qaýlysymen «Táýelsizdik urpaqtary» grantyn taǵaıyndaý boıynsha erejeleri men tujyrymdamasyn bekitti. Buǵan deıin:
«Táýelsizdik rýhymen ósip kele jatqan táýelsizdiktiń búgingi urpaqtary – bizdiń erteńgi úmitimiz, senimdi tiregimiz. 30 jyldyq tarıhy bar Táýelsiz Qazaqstannyń memlekettik saıasatynda da jastardy qoldaý jáne adamı kapıtaldy damytýǵa basymdyq beriledi. Qazirgi tańda elimizdegi Táýelsizdik urpaqtary 3,8 mln nemese el halqynyń 20%-yn quraıdy. Bıyl alǵash ret Táýelsizdiktiń 30 jyldyǵyna oraı úzdik 30 jobaǵa 3 mln teńgeden «Táýelsizdik urpaqtary» atty grant beriledi»,- degen bolatyn vedomstvonyń janyndaǵy Jastar jáne otbasy isteri komıtetiniń tóraǵasy Shahmardan Baımanov.
Ǵalymdar men zertteýshiler, otandyq ónertapqyshtar osy konkýrsqa «Ǵylym» baǵyty boıynsha qatysa alatyny belgili. Degenmen taǵy bir baǵyt boıynsha jobasyn konkýrsqa ótkizýine bolady. Aıtalyq, granttyń erejelerinde «Ǵylym» baǵytynan bólek «Bıznes» dep atalatyn baǵyty da bar. Al ónertabystyń, ǵylymı izdenistiń, zertteýdiń nátıjesinde jasalǵan bıznes joba basqa ıdeıalardan áldeqaıda tabysty, ónimdi bolatyny anyq. Osy rette ǵalymdar men zertteýshiler óziniń ǵylymı ónimin ómirge ákelý úshin grant alyp, ıdeıasyn bıznes joba retinde iske asyra alady.
Grantty 14-29 jas aralyǵyndaǵy jastar ıelene alady. Bıyl grant ıegerleriniń árqaısysyna 3 mln teńge taǵaıyndalady. Konkýrs negizinde barlyǵy 30 grant bólinedi. Grant qarjysy bir jylǵa beriledi. Konkýrs eki kezeńnen turady. Alǵashqy kezeńde ýákiletti organ konkýrstyq ótinimderdi qabyldaıdy. Qabyldaý ótken aıdyń 19-ynan bastaldy, bul proses aldaǵy qyrkúıek aıynyń 20-syna deıin jalǵasady. Al ekinshi kezeńde jeńimpazdar anyqtalady. Jeńimpazdar konkýrsty uıymdastyrýshy vedomstvo qurǵan arnaıy konkýrstyq komısıanyń otyrysynda iriktelip, belgili bolady. Konkýrstyq komısıanyń otyrystary mınıstrliktiń áleýmettik jelilerdegi resmı paraqshalarynda onlaın rejimde ótedi.
Úmitker ótinimdi memlekettik nemese orys tilinde ótkize alady. Eń aldymen jobanyń sıpattamasy berilýi tıis. Onda jobanyń ataýy men baǵytynan bastap usynylyp otyrǵan aýdıtorıasy, mısıasy, ónimi, smetasy men iske asyrý geografıasyna deıin kórsetilýi kerek. Sonymen qatar jobanyń 1 mınýttan aspaıtyn vıdeo tanystyrylymyn ázirlep, qosa joldaýy tıis. Bir jylǵa beriletin grantty ıelenýshi ár úsh aı saıyn jobanyń iske asyrylý barysy týraly esepti ýákiletti organǵa usynyp otyrady. Grant qarajatynyń basqa baǵytta jumsalǵany anyqtalsa, ýákiletti organ grant alýshyny jazbasha habardar etedi. Habarlandyrý jiberilgen kúnnen bastap bir aı ishinde grant alýǵa qarajatty memleketke qaıtarýy qajet. Joba iske asyrylmasa da grant qarajaty qaıtarylmaıtyn jaǵdaılar bar. Bul týraly konkýrstyń erejesinde:
«Qarajat:
1) grant alýshy qaıtys bolǵan;
2) grant alýshy habar-osharsyz ketti dep tanylǵan nemese qaıtys boldy dep jarıalanǵan;
3) grant alýshy is-áreketke qabiletsiz dep tanylǵan jaǵdaılarda (rastaıtyn qujattar bolǵan kezde) qaıtarylmaıdy», delingen.
Úmitkerlerdiń ótinimi qaǵaz nusqasy Nur-Sultan qalasy, Máńgilik el 8, «Mınıstrlikter úıi» ákimshilik ǵımaratynyń 14-kireberisinde, al elektrondy nusqasy generation.kaz@gmail.com poshtasynda qabyldanady.