«Tartyl Fest» respýblıkalyq týrnıriniń fınalısteri Qazaqstan quramasy atynan álem chempıonatyna barady
Bul týraly «Habar» telearnasyndaǵy «Oıan!» baǵdarlamasyna qatysqan joba uıymdastyrýshylarynyń biri Aıtym Jaqypov aıtty, dep habarlaıdy Almaty-akshamy.kz QazAqparatqa silteme jasap.
«Qazaqstan - osy sport túrin belsendi damytyp kele jatqan álemdegi aldyńǵy qatarly el. Óıtkeni, Qazaqstan «street workout» baǵytyna memlekettik deńgeıde qoldaý kórsetedi. Al bul - kóshe sporty. Búgingi tańda árbir aýlada «workout» boıynsha mamandandyrylǵan alańdar bar. Sonymen qatar, úlken masshtabtaǵy Tartyl Fest festıvali álemde birinshi ret bizde ótip jatyr. Eń bastysy, Tartyl Fest fınalısteri bizben birge Qazaqstan komandasynyń atynan álem chempıonatyna barady», - dedi Aıtym Jaqypov.
Aıta keteıik, aldaǵy senbi kúni elordada «Tartyl Fest» týrnıriniń grand-fınaly ótedi. Oǵan 170-ke jýyq adam qatysady dep josparlanýda.
«Bıylǵy 18 aqpanda Astana qalasynda «Tartyl Fest» sporttyq jobasynyń grand-fınaly ótedi. Oǵan qatysý úshin iriktelgen 180 adamnyń 170-i kele jatyr. Sondyqtan grand-fınal tartysty bolady dep oılaımyz», - dep bólisti «Dara» daryndylardy qoldaý qorynyń dırektory Erkin Tashev.
Onyń aıtýynsha, Tartyl Fest - TMD deńgeıinde ótip jatqan biregeı sporttyq joba.
«Tartyl Fest – TMD jáne onyń aýmaǵynan tys deńgeıde ótip jatqan sporttyq jobalardyń biri. Onyń avtory - Nurlan Qoıanbaev myrza. Ol kisi buǵan deıin bergen suhbattarynda osyndaı jobany qolǵa alatynyn aıtyp júrgen bolatyn. Sodan bizdi qoldaıtyndar tabylyp, qor ashylyp, osy jobany júzege asyryp jatyrmyz. Bul sporttyq saıys kópshilikke unady. Óıtkeni, bul - óte qoljetimdi sport túri. Buǵan arnaıy daıyndyqtyń keregi joq. Tek sporttyq kıimiń bolsa bolǵany. Qazir kez kelgen aýlada týrnıkter bar», - dep toqtaldy Erkin Tashev.