Balalar tárbıeshi "qytaı kespesin" bergenin aıtqan
Almaty oblysynda tórt oqýshy astan ýlanyp, aýrýhanaǵa tústi. Olar - Uzynaǵashtaǵy "Saýryq" qaıyrymdylyq mekemesinde turatyn az qamtylǵan otbasydan shyqqan balalar. 14 jastaǵy jasóspirimder dárigerlerge tárbıeshi tez daıyndalatyn kespeni bergenin aıtqan, dep habarlaıdy Almaty-akshamy.kz.
Tórt bala Jambyl aýdany aýrýhanasyna keshe 08:00 shamasynda jetkizilgen. Bári birdeı astan ýlanǵan. Olar tárbıeshi "qytaı kespesin" bergenin aıtqan.
"Balalar "keshki asta ózderi berdi" dep aıtty. Olar basy aýyryp, ishi ótip, álsiz bolyp, qusqanyna shaǵymdandy. Balalarǵa jedel kómek kórsetilip, juqpaly aýrýlar bólimine jatqyzyldy. Emdeý dárigeri habarlasqanda, balalardy eshkim izdep kelgen joq. Jetekshisi, ata-analary kelgen joq dedi", - deıdi Jambyl aýdany aýrýhanasy bas dárigeriniń orynbasary Kúlzada Arynova.
Al mekeme basshysy kespeni balalar "ózderi ákelgenin" aıtqan. Qazir bul jaǵdaıǵa qatysty tekserý bastalǵan.
"Olar ózi ne ákelip jegen eken, habarymyz da bolǵan joq, sosyn tańerteń aýyryp turmyz degennen keıin "jedel járdem" shaqyryp jibergen edik. Ata-analarynyń habary bar, biz myna jerde senimhatpen alǵannan keıin, búkil dári-dármegi, qarajat jaǵynan bolsyn, bárin aparyp, ózimiz kómektesip jatyrmyz", -dedi "Saýryq" qaıyrymdylyq mekemesiniń dırektory Qusaıyn Qasymbekov.
KTK telearnasynyń habarlaýynsha, oqýshylardyń jatyn bólmesiniń qabyrǵasy kógergen, bólme salqyn. Jergilikti turǵyndardyń biri bul qaıyrymdylyq mekemesinde uldarǵa teris baǵytta dinı ýaǵyz aıtylady dep otyr.
Aýdan ákimdigi ortalyqtyń resmı tirkelgenin, degenmen keıingi jaǵdaıǵa baılanysty qosymsha tekseris júrgiziletinin málimdegen.
"Ózimizdiń tarapymyzdan, dinı basqarmadan, teolog tarapynan jáne qosymsha tekseremiz. Sanıtarlyq-epıdemıologıalyq departament tarapynan baqylaýǵa alyp, osy jumystardyń aldyn alý, bolashaqta bolmaýy úshin, osy máseleni bárin baqylaýǵa alamyz", - deıdi Jambyl aýdany ákiminiń orynbasary Ádilbek Qambaruly.
Ýlanǵan tórt bala juqpaly aýrýlar bólimshesinde jatyr. Úsh kúnde shyǵýy múmkin. Al tekserý qorytyndysy boıynsha "Saýryq" mekemesinde ýlanǵany rastalsa, basshylyǵy zań júzinde jaýapqa tartylady.