Higgsfield AI naryqtaǵy quny $1 mıllıardtan asqan alǵashqy qazaqstandyq startap atandy, - dep habarlaıdy aqshamnews.kz tilshisi.
Todayinfo málimetinshe, jobanyń teń quryltaıshysy ári burynǵy Snap Inc kompanıasyndaǵy generatıv jasandy ıntellekt bóliminiń basshysy Aleks Mashrabov Nazarbaev ýnıversıtetinde ótken sharada resmı málimdeme jasady.
Higgsfield AI - Qazaqstannan shyqqan jahandyq jetistik
Higgsfield AI startapy keıingi eki jyl ishinde joǵary ósim kórsetip, álemdegi eń jyldam damyp kele jatqan tehnologıalyq jobalardyń birine aınaldy. Jobanyń negizin qalaýshylar - JI-zertteýshi Erzat Dýlat pen Aleks Mashrabov. Startap álemniń túkpir-túkpirinen - AQSH, Qytaı, Japonıa sıaqty alpaýyt naryqtardan - mıllıondaǵan belsendi qoldanýshylardy jınap, jahandyq aýdıtorıany ózine qaratty.
Kompanıanyń basty baǵyty - generatıv jasandy ıntellekt tehnologıalaryn qoldaný arqyly jańa ónimder men sheshimder jasaý. Bul startaptyń erekshe ári tartymdy bolýynyń basty sebebi - vızýal kontentti avtomat túrde jasaıtyn, paıdalanýshynyń kreatıvin arttyratyn quraldar júıesi.
$50 mln tabys jáne venchýrlik qoldaý
Aleks Mashrabovtyń aıtýynsha, Higgsfield AI kompanıasy jyldyq túsim boıynsha $50 mıllıon mejesinen asyp, resmı túrde «jalǵyzmúıiz» mártebesin ıelendi. Bul jetistikke 15 jyl boıy eshbir qazaqstandyq kompanıa jete almaǵan bolatyn.
Kompanıaǵa Anthropic, OpenAI sıaqty jobalarǵa qarjy salǵan Menlo Ventures syndy bedeldi venchýrlik qorlar ınvestısıa quıǵan. Sonymen qatar, áıgili bıznes-angelder de Higgsfield AI-dyń áleýetine senim artyp, $16 mıllıon kóleminde bastapqy ınvestısıa jasaǵan.