Saltanatty rásimge qatysýshylar Ivan Panfılovtyń bústine gúl shoqtaryn qoıdy.
Taldyqorǵan garnızonynyń Desanttyq-shabýyldaý quramasynda Keńes Odaǵynyń Batyry, general-maıor Ivan Panfılovtyń bústiniń ashylý rásimi ótti, dep habarlaıdy Almaty-akshamy.kz.
Ony saltanatty jaǵdaıda Qorǵanys mınıstriniń orynbasary, general-maıor Muhamedjan Talasov pen Memlekettik áskerı-tarıhı mýzeıi Almaty fılıalynyń bastyǵy, ataqty qolbasshynyń nemeresi Alýa Baıqadamova ashty.
«Qazaqstandyq áskerı qyzmetshilerdiń birneshe býyny úshin Ivan Vasılevıch Panfılov ańyzǵa aınalǵan, janqıar erliktiń jáne Otanyn sheksiz súıgen perzenttiń úlgisi bolyp qala beredi», – dep atap ótti Qorǵanys mınıstriniń orynbasary, general-maıor Muhamedjan Talasov
Qorǵanys mınıstrligi baspasóz qyzmetiniń habarlaýynsha, sharaǵa Reseıdiń Máskeý oblysy Volokalamsk qalalyq okrýginiń basshysy Mıhaıl Sylka, Jetisý oblysy men Taldyqorǵan qalasy ákimshiliginiń ókilderi, áskerı bólimderdiń komandırleri, Qarýly kúshter men aýǵan soǵysynyń ardagerleri qatysty.
«Almaty oblysynyń aýmaǵynda ornalasqan desanttyq-shabýyldaý quramasy Ivan Panfılov esimimen atalady. Dál osy jerde 1941 jyldyń jazynda el aýzynda «panfılovshylar» dep atalyp ketken 316-shy atqyshtar dıvızıasy quryldy. Búgingi kún – tarıhı kún. Qorǵanys mınıstrligine jáne búst jasaýǵa atsalysqan barshaǵa azamattarǵa alǵys aıtamyn», – dep batyrdyń nemeresi Alýa Baıqadamova sharany uıymdastyrýshylarǵa rızashylyǵyn bildirdi.
Saltanatty rásimge qatysýshylar Ivan Panfılovtyń bústine gúl shoqtaryn qoıyp, osylaısha Otan tarıhynda jarqyn iz qaldyrǵan batyrdyń rýhyna taǵzym etti.