Bul norma jańa Salyq kodeksi aıasynda kúshine enetin bolady, dep habarlaıdy aqshamnews.kz
Memlekettik kirister komıtetiniń arnaıy salyq rejımderin ákimshilendirý basqarmasynyń basshysy Erqanat Shynbergenniń sózinshe, bul tikeleı qosymshalar men ınternet-platformalar arqyly jumys isteıtin taksıster men kýrerlerge qatysty. Olar – Yandex, InDrive, Glovo, Wolt jáne basqa servıster.
Dál osy platformalardyń operatorlary jumys isteıtin adamdar úshin áleýmettik tólemderdi ustap qalyp, ózi aýdarady. Bul norma 2024 jyldyń 1 qyrkúıeginen bastap kúshine engen jáne jańa Salyq kodeksinde de saqtalmaq. Eń basty aıyrmashylyq, atalǵan sanattar úshin JK mártebesi alynyp tastalady.
– Qazir arnaıy salyq rejımin qoldanatyndar – jeke kásipkerler. Al kelesi jyldan bastap olar esepten alynyp, jeke tulǵa retinde qarastyrylady, – dedi E.Shynbergen.
Taǵy bir ózgeris bar. Ol tólem qurylymyna qatysty. Iaǵnı, biryńǵaı mólsherleme burynǵydaı 4 paıyz bolyp qalady, biraq onyń ishinen jeke tabys salyǵy alynyp tastalady. Onyń ornyna mindetti zeınetaqy jarnalary engiziledi. Bul jarnalardy da platformanyń operatory ustap qalady.
– Jańa Salyq kodeksinde de solaı, áleýmettik tólemderdiń 4 paıyzy, mysaly taksıster úshin platforma arqyly ustalady. Aı qorytyndysy boıynsha operator olardy tıisti qorlarǵa aýdarady. Qazir bul júıeni Qazaqstan boıynsha shamamen 118 myń adam paıdalanyp otyr, – dep naqtylaı tústi basqarma basshysy.
Jalpylama alǵandy, resmı túrde salyq júktemesi ózgermeıdi, mólsherleme burynǵydaı 4 paıyz bolyp qalady. Sondyqtan, qaǵaz júzinde jolaqy men jetkizý quny ózgermeýi tıis.