QR Premer-Mınıstriniń orynbasary Roman Sklár Atyraý oblysy Qyzylqoǵa aýdanyndaǵy «Taısoıǵan» polıgonynyń bir bóligin Qazaqstan ıelegine qaıtarý týraly depýtattyq saýalǵa jaýap berdi, dep habarlaıdy almaty-akshamy.kz QazAqparatqa silteme jasap.
«2016 jyldyń 22 aqpanynda synaq polıgondaryn paıdalaný jáne jaldaý týraly shart ratıfıkasıalandy. Shart boıynsha Reseı Federasıasynyń Qorǵanys Mınıstrligi jalǵa alǵan «Taısoıǵan – №929 memlekettik ushý synaq ortalyǵy» polıgonynyń soltústik bóligi qaıtadan Qazaqstannyń ıýrısdıksıasyna ótti. Atyraý oblysynyń Qyzylqoǵa aýdanynda reseılik áskerıler 749,6 myń gektar jer jerdi jaldaý shartymen paıdalanyp kelgen», - dep jazdy Roman Sklár óz jaýabynda.
Onyń aıtýynsha, atalǵan 624,6 myń gektar jer ( polıgonnyń 83,3% aýmaǵy) o bastaǵy ýaǵdalastyq sharty boıynsha qaıtarylǵan.
«Taısoıǵan áskerı polıgonynyń jeri Qazaqstan aýmaqtyq quramyna qaıtarylǵannan keıin Atyraý oblysynda eki jyl boıy topyraq pen sýda qaýipti zattardyń bolýyna zertteýler júrgizildi. Zertteý qorytyndysy boıynsha qaıtarylǵan 624,6 myń gektar jerdiń ekologıalyq qaýipsiz jáne aýyl sharýashylyǵyn júrgizýge jaramdy ekeni belgili boldy», - dep atap ótti vıse-premer.
Sondaı-aq, ol depýtattyq saýalǵa bergen jaýabynda 2022 jyly Atyraý oblysynyń áleýmettik-ekonomıkalyq damýynyń 2021-2025 jyldarǵa arnalǵan keshendi jospary aıasynda Taısoıǵan ken ornynda jobalyq-smetalyq qujattama ázirleý jáne izdestirý-barlaý jumystaryn júrgizý qarastyrylǵanyn aıtady.