«OzgeEpic» óner keńistiginde «Taboo» spektakliniń premerasy ótti, dep habarlaıdy Almaty-akshamy.kz.
Spektákldiń rejıseri – Albına Kýlahmedova, pesa avtory – Mıa Alǵojaeva. Jas talanttar - Temirbek Júrgenov atyndaǵy qazaq ulttyq óner akademıasynyń bitirýshi túlekteri.
Zamandas jastardyń bir-biriniń tilin túsingeni kórinip tur. Dramatýrgıalyq shyǵarmanyń ózi qaqtyǵystar men kútpegen oqıǵalarǵa toly. Oǵan qosa jazylýynda da erekshelikter bar. Mysaly, bir keıipkerdiń birneshe beınede oınaýy. Osy sekildi traktovkalardy Mıa Alǵojaevanyń ózi daıyn mátinde bergen. Soǵan saı rejıser avtordyń sheshimderine esh qarsylyqsyz mızansenalar qurǵan. Iaǵnı spektáklde de pesada keltirilgendeı eki akter boı kórsetedi.
Qasym rólinde – Medet Batyrjan, medbıke rólinde – Nazerke Uzaqbek. Olardyń óz keıipkerine degen súıispenshilikpen jumys jasaǵanyn ańǵaramyz. Birden úsh beıneni boıyna sińirý ońaıǵa soqpaıtyny belgili. Degenmen sahnagerlerdiń oıynynan Stanıslavskııdiń «keıipker jandylyǵynyń» dámin tattyq.
Eger spektákldiń qorytyndy bóligin (akterlerdiń balaǵa aınalyp ketip, aldyńǵy sahnalardyń barlyǵy oıyn bolyp qalýy) esepke almasaq, bul týyndyny tek akterlik oıyn men dramatýrgıa ǵana quryp tur desek bolady. Alaıda, Qasymnyń bala kezden ıýpıdi jegeni onyń bolashaqta kesir iske baratynyna silteme keltirýi. Medbıkeniń qaıta-qaıta qol saǵatyna qarap, ómir keńistigindegi ýaqyttyń azdyǵyn meńzeýi sekildi taǵy da basqa rejıserlik sheshimderdi joqqa shyǵarýǵa kelmes.
Negizgi taqyryp esirtki bolǵanymen, shyǵarmada bala tárbıesi, otbasylyq qıyndyqtar, ómirdiń máni sıaqty máseleler de kórinis tabady. Basty keıipker Qasymnyń zıandy áreketke barýy bala kezindegi materıaldyq joqshylyqtan, ata-ana tárbıesiniń kemshiliginen ekeni ony aqtap tur.
Bul qoıylymdy stýdenttik jumys retinde qaraǵan qatelik bolar. Tapsyryspen qoıylsa da, týyndynyń mahabbatpen jasalǵanyn sezemiz. Óziniń utymdy sheshimin tapqan spektákldiń ǵumyry uzaq bolǵaı.