Ospan Óken, QR Ulttyq ıadrolyq ortalyǵy Atom energıasy ınstıtýty perspektıvalyq materıaldar zerthanasynyń zerthanashysy:
"Qazirgi tańda biz sýtegini tasymaldaý úshin ony metaldyń ishine engizý tehnologıasyn daıyndap jatyrmyz. Bul ádiste sýtegini belgili bir temperatýrada qyzdyryp, metaldyń ishine engizemiz. Qajet bolǵan kezde ony qaıta qyzdyryp, belgili bir temperatýraǵa jetkizip, sýtegini shyǵaryp alamyz. Bul tásil tasymaldaý kólemin azaıtyp, sýteginiń tıimdi kólemin arttyrady. Zertteý barysynda sýtegini tasymaldaýdyń ekonomıkalyq tıimdiligi de eskerildi. Biz osy maqsatta arzan ári tıimdi metaldardy qoldanýǵa bet burdyq. Mysaly, magnııdi tańdadyq, sebebi ol jer betinde tabylýy salystyrmaly túrde jeńil jáne basqa materıaldarǵa qaraǵanda arzanyraq. Paladı nemese lantan sıaqty materıaldarmen de tasymaldaýǵa bolady, biraq olar qymbat bolǵandyqtan, biz arzan balamalardy zerttep jatyrmyz."
Qazirgi tańda Qazaqstanda 500 mıllıard tekshe metr kómir metanynyń qory bar, jáne munaı-gaz ónerkásibinde de metan aýaǵa tarap jatyr. Otandyq ǵalymdar osy metannan sýtegi óndirip, ony halyq ıgiligine jaratýǵa nıettenip otyr. Atom elektr stansıasy salynatyn bolsa, sýtegini keńinen qoldanýǵa múmkindik paıda bolady.