Qazaqstan halqyna Joldaýyn jarıalaǵan Prezıdent Qasym-Jomart Toqaev kómirtekti beıtaraptyqqa kóshýdi jedeldetetin faktordy atady, dep habarlaıdy QazAqparat tilshisi.
«Halyqaralyq sarapshylardyń pikirinshe, jahandyq kúrdeli salymdardyń úshten bir bóligi qazirdiń ózinde jańartylatyn energetıka jobalaryna tıesili. Qazaqstanda da úlken jumys atqaryldy, jańa Ekologıalyq kodeks jáne 2060 jylǵa deıin kómirtekti beıtaraptyqqa qol jetkizý strategıasy qabyldandy. Generasıanyń jalpy kólemindegi jańartylatyn energetıkanyń úlesi sońǵy bes jylda 5%-ǵa deıin ósti. 2027 jylǵa qaraı taǵy 1,4 gıgavatt qýat engiziledi», - dedi Prezıdent.
Memleket basshysy eldegi energetıkalyq balans qurylymy ózgergenin aıtyp, búkil energetıka salasyn basqarý tásilderin jetildirý qajet ekenin atap ótti.
«Sýtegi generasıasyn damytý qajet. Generasıalaý obektilerin keńeıtý-tehnologıalardy transfertteý jáne energetıkalyq mashına jasaýda óndiristi oqshaýlaý, akýmýlátor ónerkásibin qurýǵa negiz bolmaq. Baqytymyzǵa oraı, bizde shıkizat jetkilikti. Teńdestirý qýatyn, energıany jınaqtaý júıesin qurý salasynda jańa sheshimder qajet. Kómirtekti beıtaraptyqqa kóshýdi parnıktik gazdar shyǵaryndylaryna kvota saýdasy jedeldetýi múmkin. Úkimet pen bıznes osy baǵyttardaǵy múmkindikterdi paıdalanýy kerek», - dep toqtaldy Prezıdent.