Premer-Mınıstr Álıhan Smaıylovtyń tóraǵalyǵymen ótken Úkimet otyrysynda sý resýrstaryn tıimdi paıdalaný máseleleri qaraldy.
Ekologıa, geologıa jáne tabıǵı resýrstar mınıstrliginiń derekterine saı, barlyq sý toǵanynan eldi turaqty sýarýǵa shamamen 11,6 tekshe kılometr sý jumsalady, dep habarlaıdy Almaty-akshamy.kz
Onyń 11,3 tekshe kılometri nemese 97%-y ońtústiktegi tórt oblysqa tıesili. Olar – 1,28 mln gektar sýarmaly alańy bar, ıaǵnı el boıynsha barlyq sýarmaly alańnyń 80%-yn quraıtyn Almaty, Jambyl, Túrkistan jáne Qyzylorda oblystary.
"Sońǵy jyldary sý tapshylyǵy eldiń ońtústik óńirlerinde bilinýde. Osy óńirlerde vegetasıalyq kezeńniń turaqty ótýin qamtamasyz etý úshin byltyrǵy qarashadan bastap aldaǵy vegetasıalyq kezeńge daıyndyq jumystary bastaldy", – dedi S. Brekeshev.
Talqylaý qorytyndysy boıynsha, Álıhan Smaıylov vegetasıalyq kezeńniń jaqsy ótýi aldaǵy maýsymdaǵy egistiń ónimdi bolýyna ǵana emes, túptep kelgende, elimizdiń azyq-túlik qaýipsizdigine tikeleı baılanysty ekenin atap ótti.
Ol Qazaqstandaǵy segiz sý sharýashylyǵy baseıniniń jeteýi bastaýyn transshekaralyq ózenderden alatynyn atap ótti. Ózen sýlarynyń teń jartysyna jýyǵy bizge syrttan keledi.
Bul rette, sarapshylardyń boljaýyna saı, 2040 jylǵa qaraı Qazaqstanda sýdy tutyný kólemi 56%-ǵa ósedi, al sý tapshylyǵy jylyna 12 tekshe kılometrge deıin jetýi múmkin. Onyń ústine Qazaqstandaǵy ózenderdiń tartylyp bara jatqany bilinedi. Munyń barlyǵy elimizdiń ońtústik óńirlerininiń sý tapshylyǵynan zardap shegýine ákeledi.
Osyǵan baılanysty Úkimet basshysy sýdy tıimdi paıdalanýdyń óte ózekti másele bolyp otyrǵanyn aıtty.
Máselen, aýyl sharýashylyǵyna arnalǵan sýdyń nebári 60%-y ǵana egis alqaptaryna deıin jetedi. Qalǵan bóligi ınfraqurylymnyń nasharlyǵynan dalaǵa ketedi. Sondyqtan kanaldar men sý qoımalaryn jóndep, sý resýrstaryn basqarýdy avtomattandyrý qajet.
"Ákimdikter bul máseleni erekshe baqylaýda ustap, sý sharýashylyǵy obektilerin sıfrlandyrý jáne avtomattandyrý jónindegi jol kartalaryn ýaqytyly iske asyrýdy qamtamasyz etýi tıis. Kanaldar men sý qoımalarynyń menshik ıeleri óz mindetterin naqty oryndaıtyn bolsa, jóndeý jumystaryn jáne sý resýrstaryn basqarýdy jetildirýge memlekettik qoldaý sharalarymen yntalandyrý mańyzdy", – dedi Álıhan Smaıylov.
Sonymen qatar Úkimet basshysy sýarmaly sýdy tıimdi bólý kerektigine nazar aýdardy. Ákimdikter sýdy kóp qajet etetin daqyl alqaptaryn qysqartý úshin, fermerler arasynda únemi túsindirý jumystaryn júrgizýi tıis.