Senat depýtattarynyń saýalyna jaýap bergen Premer-Mınıstrdiń orynbasary – Saýda jáne ıntegrasıa mınıstri Serik Jumanǵarın Qoldau.kz platformasyn Gosagro.kz-pen birge sýbsıdıa ótinimderin qabyldaýǵa paıdalaný tıimsiz dep esepteıtinin málim etti, dep habarlaıdy almaty-akshamy.kz QazAqparatqa silteme jasap.
Buǵan deıin Senat depýtattary Gosagro.kz memlekettik sýbsıdıalaýdyń aqparat júıesinde kemshilikter bar dep esepteıtinderin atap, ondaǵy kemshilikter joıylǵansha ornyna Qoldau.kz platformasyn paıdalana turýdy usynǵan bolatyn.
Serik Jumanǵarın jaýabynda sol usynysqa baılanysty Úkmet ustanymyn bildirgen.
«Aýyl sharýashylyǵy mınıstrligi Gosagro.kz memlekettik sýbsıdıalaýdyń aqparat júıesindegi aýyl sharýashylyǵy taýaryn óndirýshilerden sýbsıdıa ótinimderin qabyldaý kezinde týyndaǵan búkil aqaýlardy tolyǵymen joıdy. Qazirgi tańda aqparat júıe shtattyq rejımde jumys istep tur. Túsken ótinimder sany –5 500, Olardyń somasy – 17,4 mlrd teńge. Jergilikti atqarýshy organdar sonyń 1,3 mlrd teńgesin maquldady», - dep jazylǵan jaýapta.
Vıse-premerdiń aıtýynsha, mólsherlemeni sýbsıdıalaýǵa qarjylyq ınstıtýttardan 4 mlrd teńgeniń ótinimi túsken.
«Túrkistan, Qaraǵandy, Atyraý, Jambyl, Soltústik Qazaqstan jáne Aqmola oblystarynda aqpan aıynan bastapaýyl sharýashylyǵy taýarlaryn óndirýshilerge tıisti sýbsıdıalar tólene bastady. Sonymen birge Gosagro.kz memlekettik sýbsıdıalaýdyń aqparat júıesine kirip, ótinim rásimdeý aýyl sharýashylyǵy taýarlaryn óndirýshilerge de, jergilikti atqarýshy organdarǵa da tegin ekenin atap ótý kerek. Osy aıtylǵandardy eskersek, «Qoldau.kz» platformasyn sýbsıdıa ótinimderin qabyldaýǵa Gosagro.kz aqparat júıesimen qatar paıdalaný tıimsiz», - dep jazady Serik Jumanǵarın.