Sý tasqyny qaýipti óńirlerde avarıalyq-qutqarý jumystary, sý tasqynyna qarsy is-sharalar, sý tasqyny saldaryn joıý jumystary jalǵasýda.
Osy saǵatta 21 494 adam óz úılerine oraldy. 8 786 adam, onyń ishinde 3 814 bala evakýasıalaý pýnktterinde.
Sý tasqyny bastalǵaly beri barlyǵy 118 507 adam, onyń ishinde 44 407 bala qutqarylyp, evakýasıalandy, dep habarlaıdy Almaty-akshamy.kz QR Tótenshe jaǵdaılar mınıstrligine silteme jasap.
Elimizdiń ortalyq jáne soltústik óńirlerinde sý tasqyny jaǵdaıy turaqtalýyna baılanysty sý tasqyny qaýipti óńirlerge jumyldyrylǵan TJM kúshteri men quraldarynyń bir bóligi turaqty ornalasý oryndaryna oralýda. Reseı Federasıasy jaǵynan Jaıyq jáne Esil ózenderiniń arnalarynda sýdyń kóterilý boljamyna baılanysty Batys Qazaqstan jáne Soltústik Qazaqstan oblystary erekshe baqylaýda.
4 534 turǵyn úı men 2 763 aýla aýmaǵynan sýdyń baǵyty buryldy. 10,9 mln astam tekshe metr erigen qar sýy soryp shyǵaryldy, 3,7 mln qapshyq jáne 1,4 mln astam tonna ınertti materıal tóseldi.
Aqtóbe, Qostanaı, Aqmola, Atyraý, Soltústik Qazaqstan oblystarynda 5 862 jeke turǵyn úı, 1 065 aýla aýmaǵy sý astynda qalýda.
TJM Apattar medısınasy ortalyǵynyń jáne TJD psıhologtary sý tasqyny qaýpi bar óńirlerdiń turǵyndaryna shuǵyl psıhologıalyq jáne aqparattyq kómek kórsetý maqsatynda táýlik boıy kezekshilikti jalǵastyrýda. Jedel jeli telefonyna 2 036 qońyraý tústi. TJM Apattar medısınasy ortalyǵynyń medısınalyq brıgadalary turǵyndarǵa qajetti kómek kórsetýde.
Zardap shekken óńirlerge temirjol, avtomobıl kólikterimen jáne áýe kemelerimen 5 029 tonna gýmanıtarlyq kómek jetkizildi.
Sý júrgen 40 avtojol, sý shaıǵan 61 avtojol, onyń ishinde 10 kópir jáne 51 jol tósemi baqylaýda qalýda. 44 eldi meken kólik qatynasynsyz qalýda, olarǵa qajetti azyq-túlik jáne dári-dármek qorlary quryldy.
Avarıalyq-qutqarý jáne sý tasqynyna qarsy jumystarǵa azamattyq qorǵaý qyzmetterinen 31 942 adam, 4 593 tehnıka, 797 sý sorý quraly, 325 júzý quraly,14 áýe kemesi jumyldyryldy.