Samsung Electronics kompanıasynyń Solve for Tomorrow respýblıkalyq startap baıqaýynyń jańa maýsymy bastaldy.
Ayala qaıyrymdylyq qorynyń qoldaýymen júzege asyrylyp jatqan joba tórtinshi jyl qatarynan ótkizilýde jáne bul joly úmitkerlerdiń rekordtyq sanyn jınady, dep habarlaıdy Almaty-akshamy.kz
Jarysqa qatysýǵa 2500-den astam joǵary synyp oqýshylary ótinish bildirip, 10 mıllıon teńge júlde qoryn sarapqa salady.
Solve for Tomorrow – bul ǵylym, tehnologıa, ınjenerıa jáne matematıka (STEM) arqyly ózekti áleýmettik máselelerdi sheshýge baǵyttalǵan ulttyq doda bolyp tabylady. Baıqaý 2009 jyly AQSH-ta qurylyp, sodan beri álemniń 23 eline tarady. Qazaqstanda ol endi ǵana tanymal bolyp keledi.
Aǵymdaǵy jarysta Qazaqstannyń túkpir-túkpirinen 700-ge jýyq mektep komandasy óz ótinimderin joldady. Bir aı ishinde qazylar alqasynyń músheleri olardy muqıat zerttep, jartylaı fınaldyq kezeńge keleshegi bar jáne eń qyzyqty 35 jobany tańdady. Endi jartylaı fınalıster jaz boıy qarqyndy daıyndyqtan ótedi. Kásibı tálimgerlerdiń kómegimen stýdentter ıdeıalaryn iske asyrý kerek. Iaǵnı, daıyn startapty tanystyrý maqsatynda jobalaryn ázirlep, jetildirmek.
Birinshi tálimgerlik sesıasy 22 maýsymda ótti. Oǵan Almaty, Astana, Taraz, Qostanaı, Qaraǵandy, Shymkent, Aqtóbe, Pavlodar jáne basqa qalalardan 120-dan astam joǵary synyp oqýshylary qatysty. Qatysýshylar dızaın oılaý tájirıbesimen tanysyp, bul olardyń jobalarynyń álsiz jaqtaryn anyqtaýǵa jáne olardy túzetýge kómektesti. Baıandamashy Qazaqstandaǵy eń úzdik dızaın oılaý mamandardyń biri Davıd Týganov boldy. Ol mektep oqýshylarymen kóptegen qupıalar men laıfhaktarmen bólisti.
Aldaǵy ýaqytta betpe-bet oqytýdan basqa taǵy birneshe onlaın tálimgerlik sesıalary men praktıkalyq semınarlar josparlanǵan. Sol jerlerde mektep oqýshylary bilimderin keńeıtip, arnaıy shaqyrylǵan IT salasyndaǵy mamandarmen tildesýge múmkindik alady.
Tálimgerlik oqytýdyń nátıjesi boıynsha qatysýshylar óz jobalarymen jumys istep, prototıpterin jasaıdy. Shilde aıynyń sońynda saıyskerler fınaldyq kezeńge ótý úshin kúreste qazylar alqasyna óz jumystaryn usynýy kerek. Baıqaýdyń sheshýshi kezeńi bıyl kúzde Astanada ótedi. Úzdik toptardyń jumysyn dástúrli túrde IT salasynyń sarapshylary men tıisti vedomstvolardyń vıse-mınıstrleri baǵalaıdy. «Solve for Tomorrow» jarysynyń júlde qory 10 mıllıon teńgeden asady. Baıqaý týraly tolyq aqparatty solvefortomorrow.kz saıtynan bilýge bolady.