Baıqaý 13-18 shilde aralyǵynda ótedi
Vıtebskidegi Slaván bazary» XXXI halyqaralyq óner festıvaliniń «Vıtebsk-2022» estrada ánshileriniń halyqaralyq baıqaýynda Erik Tólenov (sahnalyq esimi Kyle Ruh), al balalar baıqaýy aıasynda Alınur Hamzın óner kórsetedi. Bul týraly Almaty-akshamy.kz Mádenıet jáne sport mınıstrligine silteme jasap habarlaıdy.
«Vıtebskidegi Slaván bazary» XXXI halyqaralyq óner festıvaliniń «Vıtebsk-2022» estrada ánshileriniń halyqaralyq baıqaýynda P.Chaıkovskıı atyndaǵy Almaty mýzyka kolejiniń oqytýshysy Erik Tólenov (sahnalyq esimi Kyle Ruh), al balalar baıqaýy aıasynda Alınur Hamzın óner kórsetedi. Baıqaý 13-18 shilde aralyǵynda ótedi, oǵan 24 eldiń ókili qatysady.
«Dástúrli túrde ánshilerimiz joǵary oryndarǵa ıe bolyp, osy bedeldi festıválde elimizdi abyroımen tanystyryp keledi. Árıne osynaý tolaıym tabys artıser men olardyń oqytýshylary atqarǵan aýqymdy jumystyń dáleli. Otandyq vokal mektebi bıylǵy jyly da joǵary deńgeıdi kórsetetinine senimdimin», - dedi Mádenıet jáne sport mınıstri Dáýren Abaev Erik Tólenovpen kezdesý barysynda.
Qazaqstandyq ánshiler jyl saıyn, naqtyraq aıtqanda 20 jyl boıy festıváldiń eresekter men balalar baıqaýyna qatysyp, júldeli oryndarǵa ıe bolyp kele jatqanyn atap ótý qajet. Mysaly, Dımash Qudaıbergen-2015 jyly, Ádilhan Makın – 2019 jyly, Rýhıa Baıdúkenova – 2021 jyly bas júlde jeńip aldy. Sonymen qatar ár jyldary Álisher Kárimov pen Ernar Sádirbaev (Amre) júldeger atandy.
Bıyl balalar baıqaýynyń qazylar alqasy quramyna halyqaralyq baıqaýlardyń laýreaty, qazaqstandyq tanymal ánshi Álisher Kárimov kirip otyr. Buǵan deıin festıváldiń qazylar alqasynyń quramynda Roza Rymbaeva, Naǵıma Esqalıeva, Erlan Kókeev, Tolqyn Zabırova, Batyrhan Shókenov, Qarlyǵash Ábdikárimova, Qarlyǵash Ájıeva bolsa, Dımash Qudaıbergen «Vıtebsk-2021» estrada ánshileriniń halyqaralyq baıqaýynyń qazylar alqasynyń eń jas múshesi boldy.
Festıvál jalaýyn Roza Baǵlanova atyndaǵy «Qazaqkonsert» memlekettik konserttik birlestiginiń ánshisi, «Slaván bazary-2021» baıqaýynyń Gran-prı ıegeri, «Daryn» jastar syılyǵynyń jáne «Shapaǵat» medaliniń ıegeri Rýhıa Baıdúkenova kóteredi.