Ǵylym jáne joǵary bilim mınıstrliginiń málimetinshe, otandyq ǵalym sıkorııdiń dıabetke qarsy tıimdi áserin anyqtady, dep habarlaıdy aqshamnews.kz
Ál-Farabı atyndaǵy Qazaq ulttyq ýnıversıtetiniń aǵa oqytýshysy, jas ǵalym Aıjamal Baıseıitova sıkorıı ósimdiginiń qasıetin jan-jaqty zerttep, onyń dıabetke qarsy tıimdi áseri bar ekenin ǵylymı turǵyda dáleldegen.
Zertteý barysynda sıkorıı quramyndaǵy bıologıalyq belsendi zattardyń qandaǵy qant deńgeıin tómendetýge, sondaı-aq zat almasý prosesin retteýge oń yqpal etetini anyqtalǵan.
Sonymen qatar adam aǵzasynda stress áserinen paıda bolatyn radıkaldarǵa qarsy antıoksıdanttyq belsendiligi da bar ekeni belgili bolǵan. Bul ósimdiktiń densaýlyqty nyǵaıtýdaǵy áleýeti joǵary ekenin kórsetedi.
Ǵalymnyń aıtýynsha, qazirgi tańda atalǵan ǵylymı joba aıasynda halyqaralyq ǵylymı jýrnaldarda eki maqala jarıalanǵan.
"Bizdiń maqsatymyz – emdik qasıeti bar ósimdikter arqyly adam aǵzasynda jıi kezdesetin aýrýlarǵa qarsy bıologıalyq belsendi qospalar ázirleý. Qazirgi ýaqytta sıkorıı ósimdiginiń fıtohımıalyq jáne farmakologıalyq qasıetterin zerttep jatyrmyz. Búginge deıin onyń dıabetke jáne streske qarsy belsendiligi anyqtaldy. Aldaǵy ýaqytta vırýstar men bakterıalarǵa, sonyń ishinde tumaý aýrýyna qarsy áserin zertteýdi josparlap otyrmyz", - dedi Aıjamal Baıseıitova.
Aıjamal Baıseıitova ál-Farabı atyndaǵy QazUÝ-dyń Hımıa jáne hımıalyq tehnologıa fakúltetinde dáris beredi. Sonymen qatar ýnıversıtet janyndaǵy Dárilik ósimdikterdi ǵylymı-zertteý ortalyǵynda qyzmet atqarady. Ol Ońtústik Koreıadaǵy Kónsan ulttyq ýnıversıtetinde magıstratýra men doktorantýrada bilim alyp, doktorlyq dárejesin sátti qorǵaǵan.