2025 jylǵy shilde aıynda ótken VI Sporttyq Jastar oıyndary Shymkent qalasynyń jas sportshylary úshin úlken jetistiktermen este qaldy. Shymkent qalasynyń jınaqtama quramasy stend atý men oq atý boıynsha ótken jarystarda qarsylastarynan oq boıy ozyp, qos birdeı saıysta komandalyq esepte I-orynǵa ıe boldy, dep habarlaıdy Aqshamnews.kz
2025 jylǵy 21-27 shilde aralyǵynda Astana qalasyndaǵy "Target" atý kesheninde ótken VI Sporttyq Jastar oıyndary men QR Kýbogynyń III kezeńinde elimizdiń 8 óńirinen kelgen 150-den astam sportshy baq synady. Qatysýshylardyń sheberligi men daıyndyq deńgeıi joǵary bolǵanyna qaramastan, Shymkent qalasynyń komandasy 13 medal (6 altyn, 3 kúmis, 4 qola) ıelenip, úzdik nátıje kórsetti.
Ekinshi oryndy Astana qalasynyń sportshylary 8 medalmen (3 altyn, 3 kúmis, 2 qola) enshilese, úshinshi oryndy Almaty qalasynyń komandasy 9 medalmen (2 altyn, 3 kúmis, 4 qola) qanaǵat tutty.
Sarapshylardyń pikirinshe, stend atýdan Shymkent sportshylarynyń aıqyn basymdyq kórsetýi – óńirdegi sporttyq ınfraqurylym men jattyqtyrýshylar quramynyń joǵary deńgeıiniń nátıjesi.
Buǵan deıin, 2025 jylǵy 18–25 shilde aralyǵynda Almaty oblysynda ornalasqan RGKP «Almaty» olımpıadalyq daıarlaý ortalyǵy bazasynda oq atý boıynsha VI Sporttyq Jastar oıyndary ótti. Bul jarys ta elimizdiń sport tarıhynda aıryqsha oryn aldy. Eldiń 10 óńirinen kelgen 140 sportshy qatysqan saıys rekordtyq kórsetkishtermen erekshelendi.
Komandalyq esep boıynsha Shymkent qalasynyń sportshylary 38 medal (25 altyn, 6 kúmis, 7 qola) ıelenip, taǵy da kósh bastady. Bul – ózge óńirlerden áldeqaıda joǵary nátıje.
Almaty qalasy II-oryndy 30 medalmen (5 altyn, 17 kúmis, 8 qola) ıelense, Pavlodar oblysynyń komandasy 5 medal (2 altyn, 3 qola) alyp, III-orynǵa taban tiredi.
Shymkent qalasynyń oq pen stend atýdan qatarynan eki jarysta da kósh bastaýy – bul kezdeısoqtyq emes. Bul – júıeli jumys pen bilikti mamandardyń, sonymen qatar jastardyń jankeshti eńbeginiń jemisi. Búginde Shymkent qalasy elimizdiń sporttyq kartasynda kóshbasshy ortalyqtardyń biri retinde tanylyp keledi.
Sport salasyndaǵy sarapshylardyń aıtýynsha, Shymkent qalasyndaǵy olımpıadalyq daıyndyq ortalyqtary, jattyǵý bazalary men materıaldyq-tehnıkalyq qamtamasyz etý júıesi – basqa óńirlerge úlgi bola alady.
2025 jylǵy VI Sporttyq Jastar oıyndary Shymkent qalasynyń sport salasyndaǵy tabysty baǵytyn taǵy bir márte dáleldedi. Stend jáne oq atýdan kórsetilgen joǵary nátıje – bolashaq Olımpıada júldegerlerin tárbıeleýdegi mańyzdy qadam. Shymkent sportshylarynyń jeńisi – tek óńirdiń emes, búkil eldiń mereıi.