Almaty qalasynyń ákimi Darhan Satybaldy keshki ýaqytta shahardyń negizgi kósheleri men nysandaryn aralap, syrtqy jáne sáýlettik jaryqtandyrýdy jańǵyrtý jobalarynyń júzege asyrylý barysyn kórip qaıtty. Sapar kezinde ol SHAAJ boıyndaǵy kóshe shamdarynyń jelisin jáne Abylaı han dańǵyly №2 boıyndaǵy ǵımarattyń qasbetin tekserdi.
Ákim mundaı jobalardy júzege asyrǵanda tehnıkalyq talaptardy ǵana emes, qalanyń kelbetine kórik beretin sándik sheshimderdi de nazardan tys qaldyrmaý kerektigin aıtty.
«Bizge jaı ǵana surǵylt myryshtalǵan baǵandar jetkiliksiz. Qalanyń ózindik sáýlettik qoltańbasyn aıshyqtaıtyn, kóz tartarlyq tirekter kerek», — dedi Darhan Satybaldy.
Shahar basshysynyń aıtýynsha, Almatyda jańashyl ıdeıalar men tyń jobalyq sheshimder az emes. Degenmen olardyń oıdaǵydaı júzege asýy úshin sapaǵa basa mán berilip, jumys kestesi qatań saqtalýǵa tıis. Osy maqsatta jobalardyń oryndalýy men nátıjesi qatań baqylaýda bolady.
Energetıka jáne sýmen jabdyqtaý basqarmasynyń málimetinshe, SHAAJ boıyndaǵy eskirgen 224 sham zamanaýı, qýaty 200 Vatt bolatyn jańa shamdarǵa aýystyryldy. Olar jaryq kúshin retteý jáne qashyqtan basqarý fýnksıalarymen jabdyqtalǵan. Bul elektr qýatyn únemdep, tehnıkalyq jaǵdaıdy jyldam qadaǵalaýǵa múmkindik beredi.
Aıta keteıik, búginde qalanyń jaryqtandyrylý deńgeıi 88 paıyzǵa jetip otyr. Jyl sońyna deıin bul kórsetkish tolyq 100 paıyzǵa jetkizilmek.
Kóshe shamdarynan bólek, qalanyń ár aýdanynda sáýlettik jaryqtandyrý jobalary da qolǵa alynǵan. Mektepterdiń, áleýmettik jáne sporttyq nysandardyń qasbeti, sondaı-aq negizgi kósheler boıyndaǵy ǵımarattar sándik jaryqpen kómkerilmek.