Dárigerler ulttyq kıimmen kelip, tosyn syı jasady
SHQO-da Naýryz qarsańynda jańa týǵan sábıler perzenthanadan ulttyq kıimmen shyǵarylyp jatyr, dep habarlaıdy Almaty-akshamy.kz Altaynews saıtyna silteme jasap.
Mundaı sharany Aıagóz aýdanaralyq aýrýhanasy merekelik kóńil-kúı úshin uıymdastyrǵan.
Perzenthanadan shyǵatyn alǵashqy 10 nárestege ulttyq kıim kıgizip, erekshe dástúrmen úılerine shyǵaryp salyndy. Buǵan analar da qýanyshty.
«Bul dúnıe esigin ashý úshin tamasha ýaqyt. Naýryz – tabıǵat jańarǵanda toılanatyn uly meıram. Dárigerler ulttyq kıimmen kelip, bizge tosyn syı jasady», - deıdi tórtinshi ret ana atanyp otyrǵan Aqmaral Zakıránova.
Aıagóz aýdanaralyq aýrýhananyń bas dárigeri Shalqar Omarovtyń aıtýynsha, Naýryz merekesi qarsańynda balalardy ulttyq naqyshtaǵy kıimmen shyǵarý dástúrge aınalǵan.
«Jýyqta týylǵan nárestelermen birge aıdyń basynda dúnıege kelgen egiz sábıdi shyǵardyq. Olardyń salmaǵy – 1200 jáne 1300 gram ǵana. Biraq densaýlyqtary jaqsy. Kútimniń arqasynda náresteler salmaq jınap otyr, olarǵa neonatologıalyq kómek tolyq kórsetildi. Bul úshin bizdiń aýdandyq aýrýhananyń barlyq áleýeti bar», - deıdi bas dáriger.
Dál osyndaı dástúr aımaqtyń taǵy bir aýdandyq aýrýhanasynda engizilip otyr. Tarbaǵataý aýdandyq №2 aýrýhanasy da Naýryz meıramy kezinde merekelik kóńil-kúı syılaýǵa bel býǵan eken.