Bes jumys toby áreket etetin bolady.
Qazaqstannyń Premer-Mınıstri Álıhan Smaıylov kapıtaldy shetelden elge qaıtarýdy yntalandyrý jáne elimizden qarajattyń jylystaýyna qarsy is-qımyl jasaýǵa baǵyttalǵan sharalardy kúsheıtý jónindegi usynystardy talqylaý boıynsha keńes ótkizdi, dep habarlaıdy Almaty-akshamy.kz Úkimettiń Telegram kanalyna silteme jasap.
Osylaısha, QR Premer-Mınıstriniń ókimimen komısıa quryldy, onyń aıasynda bes jumys toby áreket etetin bolady. Atalǵan jumys toptary aqshalaı qarajattyń jylystaýy boıynsha taldaý júrgizip, kapıtaldy shetelden elge qaıtarýdy yntalandyrý, shekteý sharalaryn engizý, shyǵarylǵan kapıtaldy qaıtarý sharalaryn qabyldaýǵa baılanysty tıisti usynystardy ázirleıdi.
Atap aıtqanda, Qarjy mınıstrliginiń Memlekettik kirister komıtetine valútalyq baqylaýdyń jekelegen fýnksıalaryn berý jónindegi usynystar talqylandy.
Yntalandyrý sharalarynyń biri – kelip túsken valútalyq túsimniń 80%-yna aıyrbas jasalǵan jaǵdaıda, qaıtarýǵa usynylǵan qosylǵan qun salyǵy somalaryn ońaılatylǵan tártippen óteý.
Sondaı-aq rezıdent emesterge dıvıdendter tóleý kezinde salyqtyq jeńildikterdi joıý, rezıdent emes ózara baılanysty tulǵalar kórsetken materıaldyq emes qyzmetter boıynsha shegerimderdi shekteýdi engizý sıaqty shekteý sharalary usynylady. QR «Transferttik baǵa belgileý týraly» zańyn jetildirýge baǵyttalǵan normalar ázirlendi.
«Odan bólek, kapıtaldy elge qaıtarýdy yntalandyrý, sondaı-aq kapıtaldy elden shyǵarýdy salyqtyq ákimshilendirýdi kúsheıtý boıynsha da sharalar pysyqtalyp jatyr. Komısıa jumysynyń qorytyndysy boıynsha tıisti usynystar Memleket basshysynyń atyna joldanady», - delingen habarlamada.