Jambyl oblysynda bolǵan ólimmen aıaqtalǵan jol apatynan eki adam kóz jumdy, taǵy eki adam túrli jaraqatpen aýrýhanaǵa jetkizildi. Jelide taraǵan aqparatqa sáıkes, zardap shekkender – tanymal sportshy Shavkat Rahmonovtyń áıeli men uly, - dep habarlaıdy aqshamnews.kz tilshisi Massaget.kz-ke silteme jasap.
Óńirlik polısıa departamenti zardap shekkenderdiń aty-jónin naqtylamaǵanymen, apat boıynsha resmı málimet usyndy.
"2025 jyldyń 27 shildesinde saǵat 08:50-de respýblıkalyq mańyzy bar Almaty – Ekaterınbýrg avtojolynyń 299-shaqyrymynda Toyota Land Cruiser 200 kóliginiń júrgizýshisi, Qaraǵandy oblysy tarapynan Almaty qalasyna baǵyt alǵan, rólge ıe bola almaı, kólikti aýdaryp alǵan. Apat saldarynan eki adam oqıǵa ornynda kóz jumdy, taǵy ekeýi aýrýhanaǵa jetkizildi", – delingen Jambyl oblysy PD habarlamasynda.
Jol-kólik oqıǵasyna baılanysty polısıa QR QK "Kólik quralyn basqaratyn adamdardyń jol júrisi nemese kólik quralyn paıdalaný erejelerin buzýy, abaısyzda eki nemese odan da kóp adamnyń ólimine ákelýi" baby boıynsha sotqa deıingi tergeý júrgizip jatyr.
Alaıda polısıa zardap shekkenderdiń aty-jónin resmı túrde jarıalamaǵanymen, Tengrinews.kz derekkózine súıensek, kólikte rasynda UFC juldyzy Shavkat Rahmonovtyń jary otyrǵan.
Jelide de apatqa qatysty málimetter tarap jatyr. Belgili bolǵandaı:
"Apat Jambyl oblysy, Moıynqum aýdanynda bolǵan. Gúlaıym Rahmonova uly men qurbylarymen birge Qaraǵandydan Almatyǵa kele jatqan. Almaty – Ekaterınbýrg trassasynyń 296-shaqyrymynda Toyota Land Cruiser jol apatyna ushyraǵan – júrgizýshi rólge ıe bola almaǵan. 39 jastaǵy áıel oqıǵa ornynda kóz jumdy, taǵy bir 35 jastaǵy áıel aýrýhanaǵa barar jolda qaıtys boldy. Rahmonova men uly Shýǵa jetkizilgen, jaǵdaıy – ortasha aýyr", – delingen áleýmettik jelidegi jazbalarda.
Sportshynyń komandasy ázirge jaǵdaıǵa qatysty túsinikteme bergen joq.