Taý etegindegi balalardyń dýmandy mekeni- Oqýshylar Saraıynda ata-anasynyń qamqorlyǵynsyz qalǵan 170 bala tańǵadjaıypqa toly shyrsha merekesiniń qonaǵy boldy. Dástúrli jańa jyldyq shyrsha merekesin bıyl Almaty qalasy ákimdigi, Qazaqstan Respýblıkasy Sybaılas jemqorlyqqa qarsy is-qımyl Agenttiginiń Almaty qalasy boıynsha Departamenti, "IMEI" halyqaralyq aqyl-oı bilim berý ortalyǵymen birlesip uıymdastyryp otyr.
Aldymen balaqaılardy túrli ertegi keıipkerleri qarsy alyp, úlken zalǵa bastady. Osynaý sátte, naǵyz keremet bastaldy! Oqýshylar saraıynyń saltanat zaly naǵyz qýanysh pen adam senbes sıqyr álemine aınalǵandaı.
Ertegi keıipkerleriniń barlyǵy osynda jınalǵan. Ortadaǵy alyp shyrsha mańyna jınalǵan balalar da osynaý ǵajaıypqa sener-senbesin bilmeı biraz turyp, qyzyqty oıynǵa kirisip ketti. Óıtkeni, olardy qyzyqty ınteraktıvter, kóńildi oıyndar, ádemi bı men túrli syılyqtar kútip turdy. Shyrsha qonaqtaryn qalalyq Bilim basqarmasy basshysynyń orynbasary Bıbigúl Tólepbergenqyzy quttyqtap, tabysqa jetýge shaqyrdy.
Kelesi sátte balalar Oqýshylar saraıynyń shyǵarmashylyq ujymy usynǵan konserttik baǵdarlamany tamashalap, túrli ertegi keıipkerlerimen kezdesti.
-Jańa jyl balalardyń eń jaqsy kóretin merekesi. Óıtkeni, bul mereke shattyq pen qýanyshqa toly. Sondyqtan balalar ony jyl boıy tosady. Bıyl osynaý sıqyrly merekeni Oqýshylar saraıynyń ujymy uıymdastyryp, oǵan birneshe seriktesimiz qoldaý kórsetip otyr. Qaıyrymdylyq tanytyp, kómek kórsetken seriktesterimiz "IMEI" halyqaralyq aqyl-oı bilim berý ortalyǵyna, Oqýshylar saraıynyń shyǵarmashylyq ujymyna, Qazaqstan Respýblıkasy Sybaılas jemqorlyqqa qarsy is-qımyl Agenttiginiń Almaty qalasy boıynsha Departamentine jáne Qazaqstannyń avtomobıl tasymaldaýshylary men ekspedıtorlar Odaǵyna shyn júrekten alǵysymyzdy bildiremiz Osyndaı júregi jomart jandardyń arqasynda bul kún balalar úshin shyn máninde ertegi boldy. Aldaǵy 2025 jyly el Úkimeti balalar úıinde tárbıelenip jatqan balalardy patronattyq otbasylardyń tárbıelep alýy úshin zańdy erejelerdi jeńildetýdi josparlap otyr. Bul árıne, oń qadam bolar edi, -deıdi Qoǵamdyq keńestiń múshesi, belsendi jas Rafael Gasanov.
Shyrsha merekesiniń sońynda seriktester árbir balaǵa tátti torttardy syıǵa tartyp, Aıaz atalar shyǵaryp saldy.