Olardyń jarysy Chjanszákoýda ótedi.
Shańǵymen jarysý jáne bıatlonnan Qazaqstan komandasy Qytaıdaǵy Chjanszákoý klasterinde jattyǵýǵa kiristi, dep habarlaıdy Almaty-akshamy.kz Olympic.kz cilteme jasap.
Sportshylar sońǵy jattyǵý jıyndaryn shetelderde ótkizdi, sondyqtan Qytaıǵa deıingi sapar barysynda barlyq qaýipsizdik sharalaryn saqtaldy. Bıatlonshylar Beıjińge Stambýldan keldi.
«Bizde bári jaqsy. Ushý ýaqyty 20 saǵattan asty. Ushyp kelgen boıda PTR test tapsyryp, olımpıadalyq aýylǵa attandyq. Bizdiń sport túrinen jarys Chjanszákoýda ótedi, sondyqtan munda avtobýspen keldik. Jolǵa shamamen bes saǵat ketti. Qazirgi tańda biz munda jaıǵasyp úlgerdik. Árıne, 20 gradýs salqyn, qatty jel de bar. Birinshi jattyǵýymyz búgin bastalady», - deıdi bıatlonshy Vladıslav Kıreev.
Osy reıspen Beıjińge shańǵyshylar da keldi. Olar da taýly aımaq Chjanszákoýda synǵa túsedi.
«Beıjińge jetkenshe uzaq joldy artqa tastadyq. Qytaıǵa Mılannan Stambýl arqyly jettik. Keıin olımpıadalyq aýylǵa tórt jarym saǵat jol júrdik. Qytaı tarapynyń óte joǵary deńgeıde daıyndalǵany kórinip tur. Tek báriniń arnaıy kıimmen júrgeni kózge erekshe kórinedi. Olımpıadalyq aýylǵa kelgen boıda bizdi ornalastyryp, jaıǵastyrdy. Bári de qoljetimdi. Stadıonǵa deıin ár 15 mınýttan avtobýstar júrip jatyr. Aıtpaqshy, jarys joly óte qıyn. Shańǵymen jattyǵý jasap úlgerdik, trassamen tanystyq. Komanda jospar boıynsha daıyndalyp jatyr. Taǵy da atap ótkim keledi, uıymdastyrý óte joǵary deńgeıde. Qytaılyqtardyń qonaqjaılyǵy da baıqalyp tur»,- deıdi komanda bas bapkeri Aleksandr Batáıkın.