QR Eńbek jáne halyqty áleýmettik qorǵaý mınıstri halyqaralyq forýmǵa qatysty
QR Eńbek jáne halyqty áleýmettik qorǵaý mınıstri Serik Shápkenov Taraz qalasynda onlaın rejıminde ótip jatqan «Áleýmettik kásipkerlik: qoǵam men bıznes úshin jańa múmkindikter» atty halyqaralyq forýmda sóz sóıledi, dep habarlady Almaty-akshamy.kz. QR Eńbek jáne halyqty áleýmettik qorǵaý mınıstrliginiń baspasóz qyzmeti taratqan habarǵa silteme jasap.
QR Eńbek jáne halyqty áleýmettik qorǵaý mınıstrligi (budan ári – Eńbekmıni) Jambyl oblysynyń ákimdigimen birlesip uıymdastyrǵan is-sharaǵa memlekettik organdardyń ókilderi, QR Parlamentiniń depýtattary, «Atameken» UKP, Áleýmettik kásipkerlik salasyndaǵy qazaqstandyq jáne halyqaralyq ǵylymı qoǵamdastyqtyń ókilderi, Reseı, Izraıl, Qyrǵyzstan, Tájikstan sarapshylar jáne t.b. qatysty.
Eńbekmıniniń basshysy óz sózinde memleket resýrstarynyń shekteýliligi jaǵdaıynda áleýmettik kásipkerlik áleýmettik máselelerdi sheshýdiń eń tıimdi álemdik tásilderiniń biri bolyp tabylatynyn atap ótti.
«Halyqaralyq tájirıbede áleýmettik kásipkerlik kásiporyn ıeleri úshin paıdany kóbeıtý tásili retinde emes, belgili bir áleýmettik máseleni sheshý nemese qoǵamǵa paıda berý maqsatynda qyzmetter kórsetý nemese taýarlar óndirý retinde túsiniledi. Sondaı-aq, múmkindikteri shekteýli adamdar júrgizetin bıznes nemese erekshe qajettilikteri bar adamdardy jáne halyqtyń áleýmettik osal toptarynyń ókilderin jumys oryndarymen qamtamasyz etetin kásipkerler áleýmettik kásipkerlik bolyp tabylady», – dedi Serik Shápkenov.
Mınıstrdiń aıtýynsha, áleýmettik kásipkerlik damyǵan elderde (Ulybrıtanıa, AQSH jáne Ońtústik Koreıa) áleýmettik kásipkerlik boıynsha kóptegen damý ınstıtýttary bar, úkimettik emes uıymdar men áleýmettik kásipkerler kóp, qarjylaı jáne qarjylaı emes qoldaý sharalary turaqty negizde kórsetiledi.
Áleýmettik kásipkerlik qalyptasý satysyndaǵy elderde (Kolýmbıa, Egıpet, Úndistan) qoldaý sharalary turaqty negizde kórsetilmeıdi, damý ınstıtýttary men áleýmettik kásipkerlerdiń bolmaýy ne bolmashy sany baıqalady.
«Qazaqstanda áleýmettik kásipkerlikti qoldaý úshin salyq zańnamasynda birqatar yntalandyrýshy sharalar qarastyrylǵan. Mysaly, múgedektigi bar qyzmetkerler sany 51%-dy quraıtyn uıymdar korporatıvtik tabysqa salynatyn, áleýmettik jáne jer salyǵynan bosatylǵan, múlik salyǵyn esepteý kezinde olarǵa jeńildikterge beriledi», – dep habarlady Serik Shápkenov.
Sonymen qatar, barlyq salyq tóleýshiler, tipti áleýmettik kásipker emes adamdar úshin kelesi jeńildikter qarastyrylǵan:
- múlikti qaıtarymsyz (komersıalyq emes jáne áleýmettik uıymdarǵa) bergen nemese qaıyrymdylyq kómek kórsetken kezde qunǵa salyq salynatyn tabystyń mólsheri 4% - ǵa deıin tómendetiledi;
- múgedektigi bar adamdarǵa tólengen eńbekaqyǵa salyqtyq mólsherleme 2 eselengen mólsherge jáne múgedektigi bar adamdarǵa tólengen eńbekaqy jáne basqa da tólemderden áleýmettik salyq somasynan 50% - ǵa tómendetildi;
- múgedektigi bar adamdar jeke tabys salyǵyn tóleýden bosatyldy (kúntizbelik jyl úshin 882 eselengen AEK nemese 2,4 mln teńge sheginde).
Budan basqa, «Memlekettik satyp alý týraly» zańǵa sáıkes, taýarlardyń, jumystardyń, kórsetiletin qyzmetterdiń jekelegen túrleri olardy jumyspen qamtý maqsatynda múgedek adamdardyń uıymdarynan ǵana satyp alynady.
«Búginde áleýmettik kásipkerlikti damytý maqsatynda Qazaqstanda áleýmettik kásipkerlik mádenıetin damytýǵa nazar aýdarǵan mańyzdy. Ótken aptada Parlament Senatynyń depýtattary Áleýmettik kásipkerlik máseleleri boıynsha zań qabyldady. Bul áleýmettik kásipkerlikti damytýdyń naqty anyqtamasy men baǵytyn qalyptastyrýǵa, qandaı da bir kásiporyndy áleýmettik kásipkerlik sýbektisine jatqyzý krıterıılerin aıqyndaýǵa, memlekettik qoldaý sharalaryn júıeleýge múmkindik beredi», – dep atap ótti mınıstr.
Óz sóziniń sońynda Serik Shápkenov Taraz qalasynda ótip jatqan forým áleýmettik kásipkerlikti damytýdaǵy jáne memleket pen kásipkerler arasyndaǵy yntymaqtastyqty nyǵaıtýdaǵy mańyzdy qadam bolatynyna senim bildirdi, sondaı-aq is-sharaǵa qatysýshylardan zańnamaǵa engizilgen ózgeristerdi eskere otyryp, túrli alańdarda áleýmettik kásipkerlik máselesin belsendi ilgeriletýdi surady.
Eki kúndik forým aıasynda mynadaı taqyryptarda 3 paneldik sesıa ótedi: «Álemdegi áleýmettik kásipkerlikti damytý. Damý úrdisteri», «Qazaqstan Respýblıkasyndaǵy áleýmettik kásipkerlikti qoldaý tetikteri», «Halyqaralyq tájirıbe. Paıdaly laıfhaktar men quraldar» atty semınar, sondaı-aq áleýmettik kásipkerlikti damytý boıynsha master-klastar ótkizildi.