Sońǵy 5 jylda bilim salasyndaǵy zańǵa 29 ret ózgeris endi.
Sonyń ishinde úshtildilikti oqytý – urpaqtyń sanasyn sáýlelendirý emes, kerisinshe keleshegin kómeskileý. Búgin senatorlar bir kezderi qabyldanǵan zańǵa qaıta qarsy shyǵyp, shet tilderin 5-synyptan bastap oqytýǵa usynys jasady, dep habarlaıdy Almaty-akshamy.kz Qazaqstan.tv-ǵa silteme jasap.
Onda da ata-analarynyń qalaýymen júzege asyrylýy kerek. Jalpy, mundaı oıdy buǵan deıin Memleket basshysy aıtqan bolatyn.
Al álemdik banktiń zertteýinshe, Qazaqstandaǵy adam kapıtaly kórsetkishi 63 paıyz eken. Bul degenimiz 18 jasqa deıingi qalyptasýy tıis oqýshylardyń qabiletteri men daǵdylarynyń jıyntyǵy. Demek, bilim júıesi sonyń 63 paıyzyn ǵana berip otyr. Osy turǵyda óskeleń óren aldymen óz tili men dúnıetanymyn boıǵa sińirip alǵany abzal.
"Balabaqshadaǵy, 1-synyptaǵy oılaý júıesi áli tolyq jetilip qalyptaspaǵan, sanasy úlbirep turǵan qazaq sábılerine birden úsh tildi oqytýdyń qandaı qajettiligi bar? Ǵylymy men bilimi joǵary Japonıa, Fınlándıa, Fransıa, Qytaı 10 jasqa deıin balalaryn ózge tilde nege oqytpaıdy? Álemniń eń myqty degen 30 eliniń bastaýysh synyptarynda qansha til oqytylatynyn zerttep qarasaq, 2 til birinshi synypta 4-aq elde, ekinshi synypta 5 elde, tórtinshi synypta 12 elde oqytylatynyn kórdik. Al Qazaqstannan basqa álemniń birde-bir memleketinde 3 til múldem oqytylmaıdy", - dedi QR Parlamenti Senatynyń depýtaty Murat Baqtıaruly.