Senat Tóraǵasy Máýlen Áshimbaev Almaty qalalyq máslıhatynyń depýtattarymen kezdesti.
Kezdesýde elimizde júrgizilip jatqan keshendi demokratıalyq reformalar jáne Qazaqstannyń saıası júıesindegi jańǵyrtýlar jan-jaqty talqylandy, dep habarlaıdy Almaty-akshamy.kz Senate.parlam.kz-ke silteme jasap.
Senat spıkeri óz sózinde Ádiletti Qazaqstan qurýdyń negizgi qaǵıdattaryna nazar aýdaryp, osy baǵytta barlyq deńgeıdegi ókildi organdardyń birlesken jumysy mańyzdy ekenin aıtty.
Sondaı-aq Máýlen Áshimbaev aldaǵy Parlament jáne máslıhattar saılaýyna toqtaldy. Senat naǵyz óńirlerdiń múddesin qorǵaıtyn Palataǵa aınalady. Osyǵan qatysty ózgerister boıynsha da sóz qozǵaldy. Senat Tóraǵasy munyń bári Memleket basshysy Qasym-Jomart Toqaevtyń bastamasymen iske asyrylǵan konstıtýsıalyq reformanyń laıyqty jalǵasy ekenin atap ótti.
«Aldaǵy ýaqytta Parlament jańa jaǵdaıda jáne jańa talaptar men mindetterdi eskere otyryp jumys isteıdi. Senat naǵyz óńirlerdiń múddesin qorǵaıtyn organǵa aınalýy tıis. Mańyzdy ekonomıkalyq jáne áleýmettik prosester kóbine jergilikti jerlerde bolatyny belgili. Óńirlerdi keshendi damytpaı tutas eldiń órkendeýin jańa deńgeıge shyǵarý múmkin emes. Sondyqtan Ádiletti Qazaqstan qurý úshin, osy baǵytqa basymdyq berýimiz kerek», – dedi Máýlen Saǵathanuly..
Sonymen qatar Palata Tóraǵasy osy aptada senatorlar qabyldaǵan «Aglomerasıalardy damytý týraly» zań óńirlerdi jan-jaqty damytýdy kózdeıtinin aıtty. Osy zań aıasynda keshendi jospar qabyldanady. Odan bólek, zańnyń normalaryn iske asyrý azamattardy qonystandyrý jáne óndiristik kúshterdi ornalastyrý júıesin jetildirýge, ınjenerlik, kóliktik jáne áleýmettik ınfraqurylymdy tıimdi paıdalanýǵa oń áserin tıgizedi. Osyǵan oraı Máýlen Áshimbaev elimizdegi eń iri Almaty aglomerasıasyn damytý úshin Senat pen máslıhat depýtattary birlesip jumys isteýi kerektigin qaperge aldy.
«Óńirlerde Memleket basshysy bergen tapsyrmalardyń, ulttyq jobalardyń, shaǵyn jáne orta bıznesti qoldaý baǵdarlamalarynyń jáne basqa da mańyzdy basymdyqtardyń iske asyrylý barysyn baqylaýǵa erekshe nazar aýdarylady. Senattyń negizgi mindetteriniń biri – óńirlerdiń múddesin qorǵaý jáne ókildik etý. Máslıhattarmen tyǵyz ózara is-qımyl osy basymdyqtyń negizgi sharty ekeni sózsiz», – dedi Máýlen Áshimbaev.
Senat Tóraǵasy Almaty qalasyndaǵy «Alataý» áleýmettik qyzmetter ortalyǵynyń ujymymen de kezdesti. Bul jerde múgedektigi bar azamattarǵa túrli baǵyt boıynsha áleýmettik jáne medısınalyq qyzmetter kórsetiledi.
Máýlen Áshimbaev qazaqstandyqtardyń densaýlyǵyn jaqsartý, medısınalyq qyzmettiń sapasyn arttyrý jáne densaýlyq saqtaýdyń qoljetimdiligin qamtamasyz etý memlekettiń áleýmettik saıasatynyń mańyzdy baǵyty ekenin aıtty. Sondaı-aq ol Memleket basshysy Qasym-Jomart Toqaev osy salaǵa únemi basa mán berip kele jatqanyn tilge tıek etti.
Senat Tóraǵasy densaýlyq saqtaý salasyna qatysty aldaǵy zańnamalyq jumystarǵa da toqtaldy jáne Ortalyq ujymyna qamkóńil jandarǵa qamqorlyq kórsetip, elimizde osy baǵyttyń jandanýyna qosqan úlesi úshin alǵys bildirdi.
«Memleket basshysynyń tapsyrmasymen jyl saıyn medısına qyzmetkerleriniń jalaqylaryn kóbeıtýge qatysty naqty sharalar qabyldanyp keledi. Keler 2023 jyldan bastap dárigerlerdiń jalaqysy 30 paıyzǵa, orta medısınalyq qyzmetkerdiki 20 paıyzǵa ósedi. Aldaǵy kezeńde densaýlyq saqtaýǵa bólinetin qarajattyń kólemi ulǵaıa beredi. 2027 jyly onyń kólemi jalpy ishki ónimniń keminde 5 paıyzyna jetýi tıis. Dáriger mártebesi zań júzinde bekitiledi. Osyndaı naqty sharalar medısına qyzmetkerlerin qorǵaýǵa jáne qoldaýǵa, kásiptiń bedelin arttyrýǵa yqpal etedi dep senemiz», – dedi Máýlen Áshimbaev.