Saýda jáne ıntegrasıa mınıstri Arman Shaqqalıev Almatydaǵy iri saýda jelilerin aralap, saýda sýbektileriniń ókilderimen kezdesti, dep habarlaıdy aqshamnews.kz
Kezdesý barysynda dúken sórelerindegi otandyq ónimderdiń úlesin arttyrý máselesi talqylandy. Mınıstr Almatydaǵy saýda jelileriniń jalpy assortımentiniń eleýli bóligin otandyq ónimder quraıtynyn atap ótti. Áleýmettik mańyzy bar taýarlardyń ishinde, ásirese sút ónimderiniń úlesi joǵary ekeni aıtyldy.
Mysaly, Almatydaǵy dúkenderde sút ónimderiniń 97%-y Qazaqstanda óndirilgen.
«Biz otandyq fermerlermen jáne óndirýshilermen tyǵyz jumys isteımiz, olardyń ónimderin saýda jelilerine jetkizý úshin bar kúshimizdi salyp jatyrmyz. İri saýda jelilerindegi kókónisterdiń barlyǵy qazaqstandyq fermerlerdiń ónimi. Sonymen qatar, qus eti men ósimdik maıy sıaqty basqa da áleýmettik mańyzy bar ónimderdiń úlesin arttyrý óte mańyzdy qadam bolyp tabylady», – dedi mınıstr.
Otandyq óndirýshilerdi qoldaý maqsatynda mınıstr birqatar bekitilgen mindettemeler týraly málimdedi. Atap aıtqanda, barlyq otandyq ónimderge arnaıy «Qazaqstanda jasalǵan» degen belgi qoıý mindetteldi.
Sonymen qatar, ishki saýdany qoldaý fýnksıasynyń zańnamalyq túrde Saýda mınıstrligine berilýi otandyq óndirýshiler úshin úlken múmkindik bolyp tabylady. Bul shara memlekettik qoldaý alǵan saýda obektilerine sóre keńistigin 20%-ǵa arttyrýdy mindetteıdi.
Endi dúken sóreleriniń keminde 50%-y otandyq azyq-túlik ónimderimen, al keminde 20%-y turmystyq taýarlarmen toltyrylýy tıis. Bul taýarlar tutynýshylar úshin kórneki ári qoljetimdi oryndarda ornalasýy qajet.
«Tutynýshylardy aldaýǵa jol bermeý úshin biz taýarlardyń sapasy men ornalasýyna qoıylatyn talaptardy kúsheıttik. Mysaly, sút ónimderi sút sýsyndarymen, al maı – maıdyń balama túrlerimen qatar turmaýy qajet», – dep atap ótti Arman Shaqqalıev.