Jetisýdyń Sarqan aýdanynda salynǵan jel elektr stansıasy — negizinen jeke qarajat esebinen júzege asqan óńirdegi eń iri joba. Jalpy qondyrǵylardy ornatý, qurylys jumystaryn jasaýǵa 19,4 mlrd.teńge qarajat jumsalǵan.
Jetisý oblysynyń Sarqan aýdanynda qýattylyǵy 50 MVt bolatyn jel elektr stansıasy iske qosyldy, dep habarlaıdy Almaty-akshamy.kz QazAqparatqa silteme jasap.
Kezeń-kezeńimen josparlanǵan elektr stansıa qurylysy 2019 jyly bastalyp, jeldi aımaqqa eń aldymen 6 qondyrǵy ornatylyp, 2022 jyldyń qarasha aıynda tolyǵymen aıaqtalyp, óz jumysyn bastady.
Bıiktigi 100 metr, aınalǵysh qanattary 70 metr bolatyn munaranyń sany 16. Olardyń bireýiniń ózi 3,2 MVt óńdeýge qaýqarly.
«Mundaı elektr qýatyn óńdeıtin stansa Qapshaǵaı qalasynda bolsa, endi aýdanymyzdyń Lepsi aımaǵynda bar. Biraq qýattylyǵy jaǵynan basym túspek. Iaǵnı jylyna 50 MVt tok kózin óńdemek», - dedi Sarqan aýdanynyń ákimi Ǵalymjan Qanatuly.
Lepsi aýylynan 80 km qashyqtyqta ornalasqan stansıa - keń jazyqta ornalasqan jeldi aımaq. Jeldiń ótinde ornalasqan jazyq meken bolǵandyqtan, mundaı jaryq qýatyn óńdeıtin munaralar jyl boıy jaryq qýatyn óńdeı almaq.
Osyndaı iri ári tıimdi jobalardyń arqasynda aýdanǵa ınvestısıa tartylyp, jańa jumys oryndary ashylyp óńirimizdiń odan ári damýyna óz septigin tıgizedi degen sóz.
Sonymen qatar, Sarqan aýdany elektr qýatyn óndirýde basqa aýdandardan qaraǵanda basym túsip kele jatqandyǵy barshaǵa aıan. Óńirde 5 sý elektr stansıasyn salý josparlanǵan bolsa, qazirgi tańda onyń úsheýi úzdiksiz jumys jasap tur. Qalǵan eki elektr stansıalarynyń qurylys jumystary jalǵasyp jatyr.
Aıta ketý kerek, ótken jyldyń qarasha aıynan beri jel elektr stansıalary 23,767 myń bolatyn KVt saǵat óńdegen.