QR Ulttyq ulanynyń «Ońtústik» óńirlik qolbasshylyǵyna qarasty áskerı bólimderde 9 saılaý ýchaskesi jumys istep tur. Onyń úsheýi – Almaty qalasynda.
Bul ýchaskelerde daýys berý basqalarǵa qaraǵanda bir saǵatqa erte, ıaǵnı saǵat tańǵy 06.00-den bastaldy. Kúndizgi saǵat 10 bolmaı, 4 myńǵa jýyq merzimdik qyzmettegi sarbaz daýys berip boldy. Onyń ishinde 600-ge jýyǵy Almaty qalasynda. Ulttyq ulan sarbazdary daýys berýdi bárinen buryn aıaqtady. Daýys berý olardyń qyzmetine esh kedergi keltirgen joq. Jumys joǵary deńgeıde uıymdastyryldy. Qaraýyldaǵy saqshylardyń da aýysatyn merzimi esepke alynǵan. Bári tártipke saı júrgizildi.
Bir aıta keterligi, daýys berýshi sarbazdardyń jasy 18-20 jas aralyǵynda ekenin eskersek, olardyń basym bóligi ómirinde alǵash ret daýys berip tur. Bul jaǵdaı da eskerýsiz qalǵan joq, alǵash daýys bergen sarbazdarǵa kishigirim estelik syılyqtar berildi.
Sarbazdar kóterińki kóńil kúımen keldi. Olar ózderiniń bolashaǵy úshin daýys bergenderin jaqsy túsinedi jáne osy referendýmnan oń nátıjeler bolatynyna senimdi.
Almatyda ulandyqtardyń daýys berýin «Ońtústik» óńirlik qolbasshylyǵynyń qolbasshysy general-maıor Talapker Ámireev túıindep, núktesin qoıdy. Ol ýaqytqa deıin barlyq áskerı bólimderdiń áskerı qyzmetshileri referendýmǵa qatysyp, daýys bergendikteri týraly baıandap úlgergen bolatyn.