Vasılıı Jırov Almatyda Ulttyq ulan sarbazdarymen kezdesti
Quqyqtyq tártip áskerinde sarbazdardyń qoǵam qaıratkerlerimen, belgili tulǵalarmen, ataqty sprotshylarmen kezdesýi dástúrge aınalǵan. Almatydaǵy «Ońtústik» óńirlik qolbasshylyǵyndaǵy ulandyq jaýyngerler bul joly táýelsiz Qazaqstannyń alǵashqy olımpıada chempıondarynyń biri – Balqash barysy Vasılıı Jırovpen júzdesti.
1996 jylǵy Atlanta olımpıadasynyń chempıonymen kezdesý 5571 áskerı bóliminde ótti. Oǵan 300-den asa sarbaz qatysty.
Balqash jolbarysy bıik belesterdi baǵyndyrý jolynda talaı kedergiler men qıyndyqtarǵa tap bolǵanyn, tek eren eńbektiń arqasynda bárin eńsere bilgenin áserli áńgimeledi. Bıik armandarǵa jetý joldarymen bólisip, salaýatty ómir saltyn ustanýǵa da shaqyrdy. Sarbazdar tarapynan qoıylǵan saýaldar da jaýapsyz qalmady. Olımpıada chempıony ulandyq sarbazdarǵa óziniń qoltańbasy qoıylǵan bokserlik qolǵaby men fotosýretterin estelikke tartý etti.
– Jırovtyń áńgimesin zeıin qoıyp tyńdaǵan sarbazdar erekshe rýhtanyp, bul kezdesýden úlken áser alǵanyna senimdimin. Vasılıı Jırov – halqymyzdyń maqtanyshy, óziniń eńbegimen jáne tabandylyǵymen álemniń sport arenasynda Qazaqstan týyn jelbiretken sportshy. Vel Barker kýbogynyń ıegerin shaqyrýdaǵy maqsatymyz – sarbazdar arasynda salaýatty ómir saltyn nasıhattaý. Bolashaqta shyń basyna shyqqysy keletin sarbazdarǵa aǵa býyn ókilderiniń osyndaı aqyl-keńesi eshqashan artyq etpeıdi. Keregin túrtip alyp, qajetine jaratady. Sondyqtan biz bul ıgi dástúrdi jalǵastyra beremiz, – deıdi «Ońtústik» óńirlik qolbasshylyǵy Tárbıe jáne áleýmettik-quqyqtyq jumystar basqarmasynyń bastyǵy podpolkovnık Arman Seıitov.
Kezdesý sońynda chempıon sarbazdarmen estelik fotoǵa tústi.